Përtej problematikave të përditshme të udhëtimeve ajrore, “Air Albania” po konsolidohet gjithnjë e më shumë si kompania kombëtare e fluturimeve, duke krijuar një profil të qartë në treg.
Historia e saj nisi në mars të vitit 2017, ndërsa themelimi zyrtar u bë më 16 maj 2018. Me këtë hap, Shqipëria fitoi një linjë ajrore të vetën, ashtu si shumica e vendeve të tjera europiane.
Dy vite pas nisjes së operimeve, kompania u përball me sfidën më të madhe globale, pandeminë e COVID-19. Ndërsa shumë kompani ajrore ndërprenë aktivitetin, “Air Albania” vijoi të kryente fluturime riatdhesimi për qytetarët shqiptarë dhe transportin e ngarkesave mjekësore.
Pikërisht kjo kompani solli në Tiranë avionin me dozat e para të vaksinës kundër koronavirusit, duke u shndërruar në një hallkë jetike të komunikimit me botën.
Deri në vitin 2021, tre avionët e saj, ambasadorët “Migjeni”, “Lasgushi” dhe “Naimi”, vijuan të fluturonin, duke u kthyer në simbole të pranisë shqiptare në qiell.
Në shumë linja, kompania ende përfshin në çmim një bagazh të përfshirë dhe ofron vakte të ngrohta gjatë udhëtimit, duke ruajtur standarde që janë zhdukur te shumë operatorë të tjerë.
Kujdesi ndaj pasagjerëve nuk ka mbetur vetëm një slogan.
“Air Albania” ofron asistencë për pasagjerët e moshuar apo ata me probleme shëndetësore, oksigjen kur kërkohet nga mjekët, mbështetje për ata që udhëtojnë në raste familjare të dhimbshme dhe trajtim të menjëhershëm të ngarkesave mjekësore urgjente. Këto zgjedhje konkrete dëshmojnë filozofinë humane të kompanisë.
Falë saj, mbi 300 të rinj shqiptarë janë trajnuar në fushën e aviacionit, ndërsa një pjesë e tyre sot janë pjesë e linjave më të mira europiane e globale.
Kjo e ka shndërruar kompaninë në një trampolinë profesionale për brezin e ri.
Si kompani me kapital shqiptar, “Air Albania” kontribuon drejtpërdrejt në ekonominë e vendit, përmes qindra mijëra transaksioneve bankare dhe fuqizimit të zinxhirit ekonomik vendas.
Në Ballkan, shembulli i vetëm tjetër i ngjashëm është Serbia, e cila zotëron një kompani ajrore 100% shtetërore, me xhiro rreth 700 milionë euro vetëm në vitin 2024 dhe mbi 52% të tregut.
Ky rast tregon se një kompani ajrore kombëtare mund të shërbejë si shumë më tepër sesa një operator transporti: ajo mund të shndërrohet në një urë zhvillimi, duke ngritur akademi edukimi dhe trajnimi për pilotë, ekuipazhe dhe teknikë të lartë, duke gjeneruar një ekonomi të qëndrueshme dhe të orientuar drejt së ardhmes.
Por aviacioni mbetet një industri sfiduese. Avionët përballen me nevoja për mirëmbajtje teknike, furnizimet shpesh vonohen, moti mbyll aeroportet, ekuipazhet arrijnë kufirin e orareve të punës dhe konkurrenca ndikon çmimet nga ora në orë. “Air Albania” nuk ka qenë e imunizuar ndaj problemeve dhe kritikave, por ka vijuar të mbetet e pranishme në një treg tepër konkurrues.
Mesazhi që përcjell është i qartë: nëse një biletë përfshin bagazh të përfshirë, një vakt të ngrohtë dhe politika humane për pasagjerët që kanë nevojë për ndihmë shtesë, atëherë diferenca prej disa eurosh nuk është një “ndëshkim”.
Përkundrazi, është një zgjedhje për ekosistemin e udhëtimit që duam të mbështesim dhe të ruajmë.
