Një ngjarje shqetësuese është bërë publike pas një shkrimi investigativ mbi biznesmenin Lul Morina, i cili sipas denoncimit publik të gazetarit Almer Toska rezulton se ka kërcënuar hapur autorin e shkrimit dhe familjen e tij.
Gazetari Toska deklaron në rrjetet sociale se pas publikimit të materialit, ku u trajtua e kaluara kriminale e Morinës si trafikant femrash dhe droge, lidhjet e tij me pushtetin aktual dhe përfitimi i lejeve të ndërtimit falë mbështetjes politike, ai ka marrë mesazhe kërcënuese dhe fyese.
Sipas denoncimit, biznesmeni ka përdorur gjuhë shantazhi me qëllim frikësimin e gazetarit, duke tentuar ta ndalojë në publikimin e të vërtetave. “Ky veprim tregon qartë se Morina nuk ka argumente kundër fakteve, por përpiqet të heshtë të vërtetën me kërcënime”, thuhet në reagim.
Gazetari kërkon ndërhyrjen e Policisë së Shtetit dhe SPAK, duke theksuar se “heshtja e institucioneve do të thotë bashkëpunim, vonesa do të thotë mbrojtje, mungesa e hetimit do të thotë kapje e shtetit”.
Në deklaratë, Lul Morina përshkruhet si shembull i ndërthurjes së krimit të organizuar me politikën dhe ekonominë në Shqipëri, duke kaluar nga aktivitetet kriminale në vitet ’90 në përfitime të mëdha në sektorin e ndërtimit përmes lidhjeve politike dhe blerjes së votave.
“Kërcënimet nuk më trembin dhe nuk do të më ndalin. Përkundrazi, ato janë provë se shkrimi im ka goditur në zemër të së vërtetës. Ky është momenti kur Policia, Prokuroria dhe SPAK duhet të tregojnë se a janë në shërbim të qytetarëve apo të trafikantëve të lidhur me pushtetin”, theksohet më tej.
Apeli mbyllet me kërkesën që institucionet të veprojnë për hetimin dhe ndëshkimin e Lul Morinës, duke paralajmëruar se në të kundërtën rrezikohet besimi i qytetarëve tek shteti.
