Kryeministri Edi Rama ka paralajmëruar masa të rrepta ndaj abuzuesve të ujit, duke theksuar se në fazën e dytë të reformës së shërbimit të ujësjellësit do të vendoset një “vijë e kuqe” mes qytetarëve që paguajnë rregullisht dhe atyre që e vjedhin ujin.
“Ai që paguan ka të drejtën të vëri kujën se pse nuk e merr ujin. Ndërsa ai që e vjedh ujin duhet të penalizohet me heqje lirie, siç ndodhi me ata që vjedhin energjinë elektrike”, deklaroi Rama.
Kreu i qeverisë njoftoi gjithashtu krijimin e një Task Force Kombëtare për ujësjellësin, të ngjashme me atë që u ngrit për energjinë, me qëllim mbrojtjen e interesave të shumicës që paguajnë dhe ndëshkimin e pakicës që abuzon.
“Çfarë po bëjmë me këtë fazë të dytë të reformës është të garantojmë në shërbimin me ujë suksesin që garantuam me shërbimin me energji elektrike. Dhe siç sot furnizimi me energji nuk është më një problem, ashtu të jetë në Shqipërinë 2030 furnizimi me ujë. Ka ardhur koha që, përmes Operatorit Kombëtar dhe organeve ligjzbatuese, të vendosim vijën e kuqe mes atij që paguan dhe atij që vjedh ujin”, tha Kryeministri.
Sipas tij, shumica e qytetarëve që paguajnë rregullisht nuk duhet të mbajnë barrën për pakicën që përfiton padrejtësisht, ndërsa qeveria synon ta kthejë furnizimin me ujë në një shërbim të qëndrueshëm dhe të besueshëm. /skyweb.al
