Shtetet e Bashkuara kanë nisur një valë të re sulmesh ajrore kundër objektivave ushtarake iraniane, pas sulmit të Gardës Revolucionare ndaj një anijeje tregtare me flamur qipriot në Ngushticën e Hormuzit.
Komanda Qendrore Amerikane, CENTCOM, njoftoi se gjatë tre netëve radhazi janë goditur më shumë se 300 objektiva në Iran.
Në shënjestër kanë qenë sisteme raketore, dronë, infrastrukturë detare, depo municionesh, rrjete komunikimi dhe sisteme vëzhgimi bregdetar. Sipas CENTCOM, qëllimi i sulmeve është dobësimi i aftësisë së Iranit për të sulmuar anije tregtare dhe civile që kalojnë nëpër Ngushticën e Hormuzit.
Sulmet amerikane erdhën pasi forcat iraniane goditën anijen tregtare M/V GFS Galaxy, e cila po lundronte në këtë korridor strategjik detar. Autoritetet amerikane thonë se një anëtar i ekuipazhit rezulton i zhdukur, ndërsa anija ka pësuar dëme serioze dhe nuk mund të vazhdojë lundrimin.
Nga ana tjetër, Garda Revolucionare iraniane pretendon se ka qëlluar me paralajmërim ndaj një anijeje që po kalonte në një rrugë “të paautorizuar”.
Teherani njoftoi më pas mbylljen e Ngushticës së Hormuzit “deri në një njoftim të dytë”, duke rritur ndjeshëm frikën për furnizimet globale me naftë. Irani njoftoi gjithashtu sulme me raketa ndaj bazës strategjike amerikane Al Udeid në Katar dhe bazës Prince Hassan në Jordani.
Sipas Gardës Revolucionare, këto sulme ishin përgjigje direkte ndaj bombardimeve amerikane në jug të Iranit.
Kriza ka alarmuar edhe vendet e Gjirit. Katari njoftoi se ka interceptuar një sulm raketor, ndërsa Emiratet e Bashkuara Arabe thanë se janë aktivizuar operacionet kundër kërcënimeve nga raketat dhe dronët.
Në Bahrein, autoritetet aktivizuan sirenat e alarmit dhe u kërkuan banorëve të shkojnë në vendstrehime të sigurta.
Mediat shtetërore iraniane raportuan shpërthime të fuqishme në zona të rëndësishme energjetike dhe portuale, përfshirë Bushehr, Asaluyeh dhe Bandar Abbas. Përshkallëzimi i ri e bën edhe më të pasigurt çdo përpjekje diplomatike, ndërsa mbyllja e Hormuzit rrezikon të godasë tregtinë globale të naftës dhe të rrisë çmimet në tregjet ndërkombëtare.
