Këshilli Mbikëqyrës i Bankës së Shqipërisë ka miratuar rregulloret e rishikuara për sistemet e pagesave AIPS, AIPS EURO dhe AECH, si dhe për funksionimin e sistemit SWIFT, duke bërë një hap të rëndësishëm në procesin e modernizimit të infrastrukturës së pagesave në vend.
Rregulloret e reja synojnë përmirësimin e kuadrit rregullativ dhe përafrimin me standardet më të avancuara ndërkombëtare, me objektiv kryesor rritjen e efikasitetit, zgjerimin e përdorimit të pagesave elektronike dhe përfshirjen financiare.
Ndryshimet e miratuara sjellin lehtësira të drejtpërdrejta për qytetarët dhe bizneset, pasi pagesat elektronike deri në 40 mijë lekë do të kryhen pa asnjë komision, ndërsa për pagesat deri në 10 milionë lekë komisionet janë reduktuar deri në dhjetë herë, duke nxitur përdorimin e sistemit AECH.
Edhe për pagesat në euro brenda vendit, tarifat janë ulur ndjeshëm, duke ndjekur modelin e transfertave SEPA dhe duke përfshirë një trajektore të re tarifore për transfertat ndërkufitare.
Sipas vlerësimeve të Bankës së Shqipërisë, këto masa pritet të kursejnë rreth 40 milionë euro në vit për qytetarët dhe ekonominë shqiptare.
Po ashtu, krijohen kushtet teknike dhe institucionale për integrimin e plotë të vendit në zonën SEPA dhe për zbatimin e projektit TIPS Clone, që do të mundësojë realizimin e pagesave të shpejta në kohë reale. /skyweb.al
