Apple ka prezantuar gjeneratën e re të iPhone-ve, ku risia kryesore është iPhone 17 Air, një model më i hollë dhe më i lehtë, që zëvendëson versionin Plus. Telefoni pritet të kushtojë rreth 999 dollarë, rreth 100 dollarë më shumë se modelet paraardhëse, ndërsa veçantia e tij lidhet me kapacitetin e baterisë dhe cilësinë e kamerës.
Kompania ka njoftuar gjithashtu përditësime për Apple Watch, iPad dhe AirPods. Gjenerata e re e AirPods Pro sjell anulim më të avancuar të zhurmës, sensorë për matjen e temperaturës dhe rrahjeve të zemrës, ndërsa Apple Ëatch Series 11 vjen me çip më të fuqishëm dhe ekran të përmirësuar.
Megjithatë, sfida më e madhe për Apple mbetet gara në fushën e Inteligjencës Artificiale. Krahasuar me rivalë si Google, kompania ende konsiderohet prapa në aplikimin e veçorive të avancuara të AI, ndërkohë që disa funksione të premtuara në modelet e mëparshme nuk janë zbatuar ende, duke nxitur edhe akuza për reklamim të rremë.
Nga ana tjetër, çështja e prodhimit dhe tarifave tregtare ka ndikuar në politikat e Apple. Kompania ka zhvendosur një pjesë të prodhimit të iPhone-ve drejt Indisë për të shmangur tarifat e reja, por modelet Pro vijojnë të prodhohen kryesisht në Kinë dhe mbeten të prekura nga kosto shtesë.
Për investitorët, njoftimet e sotme përbëjnë një sinjal pozitiv pas shitjeve të qëndrueshme dhe marrëveshjeve të favorshme me Google, por mbetet për t’u parë se si konsumatorët do të reagojnë ndaj çmimeve më të larta dhe autonomisë më të ulët të baterisë në disa modele. /Skyweb.al
