Fjetja gjatë fluturimit nga pilotët mund të duket si një rrezik serioz për shumë pasagjerë, por sipas sindikatave gjermane të aviacionit, kjo praktikë jo vetëm që ekziston, por është edhe e zakonshme në fluturimet afatgjata, dhe e menaxhuar me kujdes në përputhje me standardet ndërkombëtare të sigurisë ajrore.
Sipas raporteve nga mediat gjermane dhe deklaratave të sindikatave të pilotëve, gjumi i shkurtër në kabinë përdoret si një mënyrë për të reduktuar lodhjen, sidomos në fluturimet me distanca të gjata, ku zakonisht janë të pranishëm më shumë se dy pilotë në bord.
“Nuk flasim për gjumë të pakontrolluar apo mungesë përgjegjësie. Bëhet fjalë për pushime të planifikuara, të cilat ndihmojnë në ruajtjen e vigjilencës gjatë gjithë fluturimit,” janën shprehur përfaqësues të sindikatës së pilotëve.
Studime të mëparshme në Bashkimin Europian kanë treguar se deri në një në tre pilotë ka pranuar se është ndjerë përgjumur ose ka fjetur për pak kohë gjatë fluturimit. Megjithatë, këto pushime kryhen vetëm kur ka një ekuipazh të plotë në kabinë dhe një pilot tjetër është gjithmonë në kontroll të avionit.
Sindikatat thonë se problemi kryesor nuk është gjumi në vetvete, por oraret e ngarkuara dhe mungesa e kohës për rikuperim mes fluturimeve. Ato bëjnë thirrje që kompanitë ajrore të mos e neglizhojnë rëndësinë e pushimit për pilotët dhe të respektojnë kufizimet maksimale të orarit të punës të përcaktuara nga rregulloret ndërkombëtare.
Nga ana tjetër, pasagjerët shpesh ndihen të pasigurt kur dëgjojnë për raste të tilla. Por ekspertët e aviacionit sigurojnë se çdo element i fluturimit, përfshirë edhe pushimet e pilotëve është i kontrolluar rreptësisht dhe i certifikuar nga autoritetet përkatëse. /Skyweb.al
