Një delegacion i Komisionit për Kontrollin Buxhetor të Parlamentit Europian, i udhëhequr nga kryetari Niclas Herbst, do të zhvillojë një vizitë zyrtare në Shqipëri dhe Malin e Zi nga 16 deri më 18 shtator. Qëllimi i vizitës është vlerësimi i ngritjes dhe funksionimit fillestar të mekanizmave të rinj të kontrollit dhe auditimit, të krijuar në kuadër të Mekanizmit për Reforma dhe Rritje për Ballkanin Perëndimor, që synon garantimin e menaxhimit të shëndoshë financiar të fondeve të BE-së.
Në Podgoricë, eurodeputetët do të takohen me Kryetarin e Komisionit për Ekonominë, Financat dhe Buxhetin e Parlamentit të Malit të Zi, me Ministrin e Financave dhe Prokurorin e Lartë të Shtetit, si dhe me përfaqësues të Institucionit të Kontrollit të Shtetit. Delegacioni do të vizitojë gjithashtu Bankën e Zhvillimit të Malit të Zi.
Më pas, vizita do të vijojë në Tiranë, ku eurodeputetët do të takohen me përfaqësues të qeverisë dhe të shoqërisë civile, si dhe do të vizitojnë një projekt të financuar nga Bashkimi Europian. Më 18 shtator, në orën 14:00, do të mbahet një konferencë për shtyp në Shtëpinë e Evropës në Tiranë.
“Shqipëria dhe Mali i Zi, si vende kandidate për në BE, po marrin tashmë fonde nga BE-ja. Ne duam të zbulojmë se si monitorohen këto shpenzime dhe të shohim vetë ndikimin e parave në terren,” tha përpara vizitës kryetari i delegacionit, Niclas Herbst. /skyweb.al
