Në vitin 2017, klientët kritikuan idenë e një iPhone që do të kushtonte 1,000 dollarë. Sot, disa blerës mund të përfundojnë duke paguar dyfishin e kësaj shume nëse zgjedhin modelin më të avancuar të Apple, raporton CNN.
iPhone 17 Pro Max, varianti më i madh i telefonit Pro të Apple që është lançuar se bashku me iPhone 17, 17 Pro dhe iPhone Air, kushton 2,000 dollarë nëse blerësit zgjedhin versionin me dy terabajt (2TB) hapme më shumë hapësirë në memorie. Telefonat me më shumë hapësirë zakonisht kushtojnë më shumë, por kjo është hera e parë që Apple nxjerr një opsion me 2TB për iPhone, duke e bërë atë një nga telefonat më të shtrenjtë në treg.
Lançimi vjen në një kohë kur Apple përballet me presion për të rritur shitjet e iPhone mes shqetësimeve për strategjinë në fushën e inteligjencës artificiale. Ofrimi i një niveli çmimi më të lartë për iPhone i lejon Apple të gjenerojë më shumë të ardhura pa pasur nevojë të shesë më shumë njësi, në një treg që deri vonë ka qenë i paqëndrueshëm për telefonat e mençur. Disa analistë thonë se konsumatorët, të prekur nga inflacioni dhe tarifat doganore, po kufizojnë shpenzimet për smartphone.
iPhonet e rinj të Apple pritet të rrisin lehtë çmimin mesatar të shitjes së produktit, ose çmimin mesatar me të cilin shiten iPhonet, tha Angelo Zino, nënkryetar i lartë në firmën kërkimore të investimeve CFRA. Ky është një tregues që analistët e ndjekin për të parë sa fitimprurës është iPhone për Apple. /Skyweb.al
