Autoriteti Kombëtar për Sigurinë Kibernetike (AKSK) ka paralajmëruar qytetarët për një fushatë të re mashtruese të tipit “smishing”, e cila po qarkullon përmes mesazheve telefonike.
Në këtë fushatë, qytetarëve u dërgohet një mesazh i rremë që i njofton për gjoba të supozuara të qarkullimit rrugor, duke u kërkuar të kryejnë pagesa online përmes një linku mashtrues.
AKSK thekson se këto mesazhe nuk janë komunikime zyrtare nga institucionet shtetërore dhe u bën thirrje qytetarëve të jenë të kujdesshëm, të mos klikojnë në linqe të dyshimta, të mos japin të dhëna personale dhe të mos kryejnë pagesa në faqe që nuk janë të verifikuara.
Autoriteti ka ndërmarrë masat për të raportuar dhe bllokuar faqen mashtruese, me qëllim parandalimin e dëmeve të mundshme.
AKSK u bën thirrje qytetarëve që hasin raste të ngjashme inkurajohen të raportojnë menjëherë. /Skyweb.al
