Një model i avancuar i inteligjencës artificiale, i quajtur Delphi-2M, është zhvilluar për të parashikuar rrezikun e shfaqjes së sëmundjeve deri në 20 vjet përpara. I ngjashëm në funksion me ChatGPT, ky sistem “orakull” modern analizon historinë mjekësore dhe faktorët e stilit të jetesës për të vlerësuar probabilitetin që një person të preket nga një ose më shumë sëmundje.
Modeli është rezultat i një bashkëpunimi shkencor midis Laboratorit Evropian të Biologjisë Molekulare (EMBL), Qendrës Gjermane të Kërkimeve për Kancerin (DKFZ) dhe Universitetit të Kopenhagenit. Ai është trajnuar me të dhënat e mbi 400,000 pacientëve nga UK Biobank, një studim mjekësor afatgjatë, dhe i është publikuar artikulli përkatës në revistën shkencore “Nature”.
Delphi-2M mund të parashikojë rrezikun për 1,258 lloje sëmundjesh, përfshirë kancerin, ataket në zemër. Megjithatë, është më pak i saktë në rastin e patologjive me shfaqje të paparashikueshme si çrregullimet mendore apo ato të shtatzënisë.
Kur u testua në të dhënat shëndetësore të 1.9 milionë pacientëve nga Regjistri Kombëtar i Pacientëve në Danimarkë, parashikimet rezultuan të jenë pothuajse po aq të sakta sa në të dhënat britanike, mbi të cilat ishte trajnuar.
Megjithatë, modeli paraqet disa kufizime: është trajnuar kryesisht mbi pacientë të moshës 40–60 vjeç dhe mund të mos përfaqësojë mirë grupmoshat më të reja apo popullatat me përkatësi të ndryshme etnike. /Skyweb.al
