Elon Musk, miliarderi i njohur dhe pronar i rrjetit social X, është aktualisht personi më i ndjekur në platformë, duke lënë pas figura si Barack Obama dhe Cristiano Ronaldo. Përveç angazhimit në teknologji dhe biznes, Musk njihet për deklaratat e tij shpesh të forta mbi çështje globale dhe këtë herë, vëmendjen e ka përqendruar tek energjia.
Sipas tij, bota po përballet me një kërcënim të afërt, një krizë të thellë energjitike, e cila buron nga rritja e shpejtë e konsumit të energjisë në shkallë globale. Dy janë faktorët që e shtyjnë këtë rritje, sipas Musk, përhapja masive e inteligjencës artificiale dhe zgjerimi i përdorimit të mjeteve elektrike, veçanërisht makinave.
Ai thekson se inteligjenca artificiale është shumë kërkuese në burime, jo vetëm energjetike por edhe mjedisore. Si shembull, Musk përmend se një përgjigje mesatare nga ChatGPT, rreth 100 fjalë, shpenzon afërsisht 519 mililitra ujë. Duke pasur parasysh se sistemi përpunon rreth 25 miliardë kërkesa në ditë, ndikimi në burimet natyrore është i konsiderueshëm.
“Po shohim një bum të njëkohshëm të AI dhe makinave elektrike, dhe kjo po çon në një shpërthim të kërkesës për energji elektrike,” paralajmëron Musk. Ai shton se infrastruktura aktuale elektrike nuk është e gatshme të përballojë këtë nivel ngarkese.
Ndërsa shumë vende po investojnë në energji të rinovueshme për të reduktuar varësinë nga lëndët fosile, Musk propozon një zgjidhje më pak të popullarizuar, por që ai e konsideron jetike, energjinë bërthamore. Sipas tij, ajo ofron një furnizim të qëndrueshëm dhe të pandërprerë me energji, me një ndikim shumë më të ulët në mjedis. /Skyweb.al
