Të mbushësh 60 vjeç nuk konsiderohet më domosdoshmërisht fillimi i pleqërisë. Rritja e jetëgjatësisë, përparimet e mjekësisë dhe një stil jetese më aktiv po bëjnë që shumë njerëz në këtë moshë të vazhdojnë të punojnë, udhëtojnë, ushtrohen dhe të nisin projekte të reja personale apo profesionale.
Pikërisht nga ky ndryshim ka lindur edhe shprehja “60 është 40-ta e re”.
Krahasuar me brezat e mëparshëm, shumë 60-vjeçarë sot janë më të shëndetshëm dhe më aktivë. Në të njëjtën kohë, shumica e tyre kanë kaluar periudhën intensive të rritjes së fëmijëve dhe kanë më shumë kohë për veten, udhëtimet, aktivitetin fizik dhe interesa të reja.
Një sondazh i realizuar në Britaninë e Madhe tregoi se më shumë se gjysma e personave mbi 60 vjeç mendonin se pleqëria fillon vetëm pas moshës 76 vjeç, ndërsa pothuajse një e treta e vendosnin kufirin pas të 80-ave.
Rreth 46% e të anketuarve thanë gjithashtu se ndiheshin në gjendje fizike më të mirë sesa prindërit e tyre kur kishin të njëjtën moshë. Një në dhjetë deklaronte madje se kishte më shumë energji sesa fëmijët e vet.
Ndryshimi nuk është vetëm fizik. Për shumë njerëz, të 60-at po kthehen në një periudhë ku mund të provojnë gjëra që më parë i kishin shtyrë për shkak të punës apo detyrimeve familjare.
Disa zgjedhin të hapin një biznes, të ndryshojnë profesion, të mësojnë aftësi të reja apo të rikthehen në shkollim. Të tjerë nisin të udhëtojnë më shumë, të merren me sport apo të zhvillojnë hobi që nuk kishin pasur kohë t’i ndiqnin më parë.
Ekspertët argumentojnë se edhe mënyra se si e kuptojmë moshën ka ndryshuar. Një 60-vjeçar i 50 viteve më parë mund të konsiderohej i moshuar, ndërsa sot, për shumë njerëz, kjo moshë përfaqëson thjesht një fazë tjetër të jetës me më shumë eksperiencë dhe më pak detyrime.
Shembuj të këtij realiteti shihen edhe te figura të njohura si George Clooney, Brad Pitt, Keanu Reeves, Salma Hayek apo Michelle Pfeiffer, të cilët vazhdojnë të punojnë intensivisht edhe në të 60-at.
Natyrisht, personazhet e famshëm kanë akses shumë më të madh në kujdes shëndetësor dhe burime financiare, por tendenca e një jete më aktive në këtë moshë po shihet edhe te njerëzit e zakonshëm.
Megjithatë, disa ekspertë nuk pajtohen me shprehjen “60 është 40-ta e re”, pasi ajo mund të krijojë idenë se të qenit 60 vjeç është diçka negative që duhet fshehur.
Në realitet, 60 mbetet 60, por kjo nuk do të thotë se një person duhet të heqë dorë nga puna, udhëtimet, aktiviteti fizik apo planet e reja.
Një nga pengesat kryesore vazhdon të jetë paragjykimi ndaj moshës. Një studim në SHBA tregoi se 93% e personave nga 50 deri në 80 vjeç kishin hasur të paktën një formë diskriminimi ose stereotipi të lidhur me moshën.
Këto paragjykime mund t’i bëjnë njerëzit të besojnë se nuk janë më në gjendje të mësojnë, të ndryshojnë profesion apo të ndërmarrin diçka të re, edhe kur gjendja e tyre fizike dhe mendore ua lejon këtë.
Edhe mënyra se si njeriu e sheh plakjen duket se ka rëndësi. Studime të Yale School of Public Health kanë treguar se personat që kanë një qëndrim më pozitiv ndaj plakjes kanë jetuar mesatarisht 7.5 vjet më gjatë se ata që e perceptonin atë në mënyrë më negative.
Mesazhi i ekspertëve është se një fillim i ri është i mundur edhe pas të 60-ave. Nuk kërkohen domosdoshmërisht ndryshime drastike, por hapa të vegjël dhe të vazhdueshëm drejt diçkaje që personi dëshiron të bëjë.
Avantazhi është se në këtë moshë askush nuk nis nga zero. Përvoja, njohuritë, sukseset dhe dështimet e dekadave të mëparshme mund të kthehen në kapitalin më të vlefshëm për kapitullin e ri të jetës. /skyweb.al
