Fëmijët e lindur sot në Shqipëri pritet të arrijnë vetëm 63% të potencialit të tyre produktiv kur të bëhen të rritur.
Të dhëna dalin nga relacioni shpjegues i projektvendimit për miratimin e Agjendës Kombëtare për të Drejtat e Fëmijëve 2027–2030, ku citohet një analizë e UNICEF mbi kapitalin njerëzor.
Sipas dokumentit që ka konsultuar skyweb.al, ky tregues është më i ulët se mesatarja rajonale, e cila llogaritet në 69%.
Në praktikë, kjo do të thotë se një fëmijë i lindur sot në Shqipëri rrezikon të mos zhvillojë plotësisht aftësitë, arsimimin, shëndetin dhe kapacitetin e tij ekonomik në moshë madhore.
“Nga analiza e UNICEF mbi kapitalin njerëzor rezulton se fëmijët e lindur sot në Shqipëri pritet të arrijnë vetëm 63% të potencialit të tyre produktiv në moshë madhore, nën mesataren rajonale prej 69%, duke treguar nevojën për investime më të forta në zhvillimin e hershëm, arsim cilësor, mbrojtje sociale dhe mirëqenie të fëmijëve dhe të rinjve”, thuhet në dokumentin e qeverisë për Agjendën e Fëmijëve.
Relacioni e lidh këtë situatë me nevojën për investime më të forta në zhvillimin e hershëm të fëmijëve, arsim cilësor, mbrojtje sociale dhe mirëqenie.
Dokumenti thekson se Shqipëria ka bërë përparim në forcimin e kuadrit ligjor dhe institucional për të drejtat e fëmijëve, por vijon të përballet me sfida të rëndësishme. Ndër to përmenden varfëria e fëmijëve, pabarazitë sociale dhe territoriale, si dhe aksesi jo i barabartë në shërbime cilësore.
Agjenda Kombëtare për të Drejtat e Fëmijëve 2027–2030 synon të forcojë sistemin e mbrojtjes së fëmijëve, të përmirësojë koordinimin mes institucioneve dhe të garantojë më shumë shërbime për fëmijët në nivel qendror dhe vendor.
Sipas relacionit, investimi te fëmijët shihet si domosdoshmëri jo vetëm sociale, por edhe ekonomike, pasi lidhet drejtpërdrejt me kapitalin njerëzor dhe zhvillimin afatgjatë të vendit. /skyweb.al
