Një ngjarje tronditëse dhe e rrallë ka ndodhur së fundmi në një fluturim të linjës Kabul–Delhi, ku një djalë vetëm 13 vjeç mbijetoi një udhëtim ajror prej më shumë se 1,000 kilometrash, duke u fshehur në hapësirën e rrotave avionit. Ngjarja e jashtëzakonshme është konfirmuar nga autoritetet indiane.
Adoleshenti nga Afganistani ishte futur në hapësirën e pasme, të palosjes së rrotave të një avioni të kompanisë ajrore Kam Air, që ishte nisur nga aeroporti ndërkombëtar i Kabulit drejt Delhi-t. Ai udhëtoi përreth 90 minuta në një nga zonat më të rrezikshme të një avionic, në kushte ekstreme mund të arrijë temperatura nën -50°C.
Pas uljes së avionit në Aeroportin Ndërkombëtar Indira Gandhi në Indi, adoleshenti u zbulua duke ecur i vetëm në pistë, veshur me rroba të zakonshme shtëpie. Stafi i aeroportit dhe forcat e sigurisë (CISF) ndërhynë menjëherë dhe e ndaluan atë për hetime.
Sipas autoriteteve indiane, djali nuk kishte me vete as dokumente, as bagazh, dhe deklaroi se kishte hipur në avion për t’u arratisur nga vendi i tij. Pas procedurave të verifikimit, ai u riatdhesua në Kabul me të njëjtin avion.
Ekspertët e aviacionit theksojnë se ky është një nga rastet tepër të rralla ku një person mbijeton një fluturim të tillë. Sipas statistikave të përmbledhura nga Administrata Federale e Aviacionit (FAA), nga rreth 130 raste të tilla që janë regjistruar globalisht që nga vitet ’40, më shumë se 75% kanë përfunduar me vdekje. Shkaqet kryesore janë mungesa e oksigjenit dhe ekspozimi ndaj temperaturave ekstreme në lartësi mbi 10,000 metra. /Skyweb.al
