Një studim i fundit i publikuar nga Journal of Safety Research dhe Transport & Environment, në bashkëpunim me Universitetin e Loughborough, ka zbuluar se fëmijët kanë tetë herë më shumë gjasa të humbin jetën nëse përplasen nga një SUV sesa nga një automjet kompakt.
Sipas analizës, lartësia e madhe e kofanos së SUV-ve ul ndjeshëm fushën e dukshmërisë për drejtuesit e mjetit, duke e bërë më të vështirë vërejtjen e fëmijëve apo këmbësorëve të tjerë. Për shembull, një fëmijë 4-vjeçar (1,10 metra) apo edhe një 9-vjeçar (1,36 metra) shpesh nuk janë të dukshëm nga pozicioni i shoferit në një SUV, ndryshe nga automjetet kompakte, ku këta përdorues rrugorë janë dukshëm më të ekspozuar ndaj vështrimit të drejtuesit.
Rezultatet tregojnë një disbalancë shqetësuese: edhe pse makinat përfshihen më shpesh në aksidente fatale, SUV-të dhe pickup-et mbartin një peshë të madhe në numrin e viktimave. Vetëm SUV-të përbëjnë 25,4 për qind të vdekjeve në rrugë, megjithëse janë të përfshirë në 14,7 për qind të aksidenteve, ndërsa pickup-et janë përgjegjëse për 12,6 për qind të vdekjeve, ndonëse përfshihen në vetëm 5,6 për qind të rasteve.
Ekspertët theksojnë se kombinimi i peshës së lartë dhe dizajnit të ngritur e bën SUV-në më të rrezikshme për këmbësorët, veçanërisht për fëmijët. Studimi kërkon rishikimin e standardeve të sigurisë për këto mjete dhe kufizimin e përdorimit të tyre në zonat urbane ku qarkullojnë më shumë fëmijë e këmbësorë.
