Mbi 126 mijë mjete janë testuar në qendrat e kontrollit teknik në të gjithë vendin gjatë katër muajve të parë të vitit 2026, ndërsa mijëra automjete të vjetra janë nxjerrë përfundimisht nga qarkullimi për shkak të mungesës së standardeve të sigurisë.
Të dhënat e publikuara nga Drejtoria e Përgjithshme e Shërbimeve të Transportit Rrugor tregojnë se nga janari në prill janë kontrolluar gjithsej 126,719 mjete të kategorive të ndryshme, në kuadër të verifikimeve periodike që synojnë rritjen e sigurisë rrugore.
Pjesën më të madhe të testimeve e përbëjnë automjetet e përdorimit të përditshëm, të kategorisë 4+1 dhe 8+1 vende. Në total janë kontrolluar 112,164 mjete të kësaj kategorie, ose 88.5% e totalit, duke konfirmuar dominimin e tyre në qarkullimin rrugor në vend.
Kontrolleve teknike iu nënshtruan gjithashtu 6,888 kamionë, që përbëjnë 5.4% të totalit, si dhe 5,494 motomjete, ose 4.3%. Në të njëjtën periudhë janë testuar edhe 1,261 autobusë, 483 rimorkio dhe 429 mjete ndërtimi.
Paralelisht me kontrollet, procesi ka çuar edhe në pastrimin e flotës nga mjetet më problematike. Sipas DPSHTRR, 2,538 automjete me moshë mesatare 22 vjeç janë çregjistruar përfundimisht, një rritje me 35.3% krahasuar me të njëjtën periudhë të një viti më parë.
Arsyet kryesore lidhen me mungesën e kushteve teknike, standarde të paplota sigurie, amortizim të lartë dhe konsum të shtuar, faktorë që i kthejnë këto mjete në rrezik potencial në rrugë.
Autoritetet theksojnë se kontrolli teknik mbetet një nga instrumentet kryesore për uljen e riskut të aksidenteve dhe garantimin e standardeve teknike dhe mjedisore të mjeteve që qarkullojnë në vend.
Rritja e numrit të mjeteve të çregjistruara tregon një tendencë për forcimin e filtrit të sigurisë, në një kohë kur flota e automjeteve në Shqipëri mbetet ndër më të vjetrat në rajon. /skyweb.al
