Mes shqetësimeve në rritje për thirrjet spam dhe qendrat e thirrjeve, WhatsApp po rikthen në vëmendje një funksion që u mundëson përdoruesve të heshtin thirrjet nga numra të panjohur.
Sipas platformës, këto thirrje nuk do të bien në telefonin tuaj, por do të shfaqen në listën e thirrjeve, në rast se bëhet fjalë për një kontakt të rëndësishëm.
Për ta aktivizuar këtë veçori, përdoruesit duhet të shkojnë te Cilësimet > Privatësia > Thirrjet, ku mund të zgjedhin ta aktivizojnë ose çaktivizojnë funksionin sipas preferencës së tyre.
Gjithashtu, WhatsApp rikujton edhe seksionin “Kontrolli i Privatësisë”, i cili ndodhet te Cilësimet dhe Privatësia. Ky seksion u jep mundësi përdoruesve të kontrollojnë dhe përditësojnë nivelet e privatësisë në aplikacion, duke përfshirë sigurinë e mesazheve, thirrjeve, informacionit personal dhe statusit të fundit online.
Sipas kompanisë, ky mjet i ndihmon përdoruesit të zgjedhin nivelin e mbrojtjes që u përshtatet më mirë, të gjitha në një vend të vetëm. /skyweb.al
