Një grup kriminal i sulmeve kibernetikë ka tentuar të rekrutojë një gazetar të BBC-së për të kryer një sulm të sofistikuar ndaj rrjetit të transmetuesit britanik.
Sipas raportimeve, grupi që identifikohet me emrin “Medusa” i ka dërguar gazetarit një ofertë të papritur dhe tepër joshëse. Ata i kanë premtuar që do t’i ofrojnë një përqindje të madhe nga fitimet e sulmit, deri në 25% dhe me këtë siguri financiare, gazetari “nuk do të ketë nevojë të punojë më kurrë”.
“Ata dërguan një link për faqen e rekrutimit të Medusa në një forum ekskluziv për krimin kibernetik, duke më nxitur të filloja procesin e sigurimit të 0.5 bitcoin (rreth 55,000 dollarë) në një marrëveshje depozite. Në fakt, ata më garantuan këto para të paktën pasi të jepja të dhënat e mia të hyrjes”, shprehet gazetari.
Gazetari, i cili ka preferuar të mbetet anonim, ia ka raportuar menjëherë ngjarjen ekipit të sigurisë kibernetike të BBC-së, duke mos pranuar të bashkëpunojë me kriminelët. Bashkëpunimi i tij ka qenë vendimtar për parandalimin e një sulmi të mundshëm që do të kishte pasojat jo vetëm për BBC-në, por edhe për miliona shikues dhe përdorues të shërbimeve të saj.
Ekspertët e sigurisë theksojnë se sulmet nga brenda janë ndër më të rrezikshmet, pasi sulmuesit përdorin akseset dhe njohuritë e brendshme për të anashkaluar mekanizmat mbrojtës. Ky incident vjen si një paralajmërim i fortë për të gjitha organizatat mediatike dhe jo vetëm, që të forcojnë sistemet e tyre të mbrojtjes dhe të jenë vigjilentë ndaj përpjekjeve të rekrutimit të paligjshëm.
Gjithashtu, rasti nënvizon edhe rrezikun e rrjeteve sociale dhe komunikimeve online, ku kriminelët përdorin taktika manipuluese për të bindur viktimat e tyre. BBC-ja ka theksuar se do të vazhdojë të përmirësojë masat e sigurisë dhe do të mbështesë punonjësit e saj në mënyrë që të shmangen rreziqet e tilla. /Skyweb.al
