Klima në Shqipëri ka pësuar ndyshime të mëdha në dekadat e fundit, ku ka mbizotëruar vera e nxehtë dhe dimri i ngrohtë. Ndryshimi i kushteve klimatike ndikon drejtpërdrejt në sektorët e ekonomisë. Më e prekur ndër to është bujqësia.
Një studim i fundit, që krahason klimën aktuale me atë të para 30 vitesh, tregon se ndikimi i klimës mesdhetare në Ballkan është zbehur ndjeshëm, ndërsa kushtet kontinentale po shtrihen me shpejtësi drejt jugut dhe lindjes së rajonit. Në vendin tonë, sipërfaqja me klimë kontinentale është rritur nga vetëm 1.3% në periudhën 1960–1990 në mbi 16% gjatë tre dekadave të fundit.
Sipas ekspertëve, rreth 30 vite më parë, Shqipëria, Greqia, Mali i Zi dhe një pjesë e Bosnjës e Kroacisë karakterizoheshin kryesisht nga një klimë e moderuar mesdhetare, falë afërsisë me detet Adriatik, Jon, Egje dhe Detin e Zi. Ndërkohë, klima kontinentale mbizotëronte më shumë në zonat e brendshme të Maqedonisë së Veriut, Serbisë e Bullgarisë, si dhe në fushat bujqësore të Rumanisë.
Por situate nuk është më e njëjtë pas më shumë se tre dekadash. Studimi në fjalë tregon se janë zgjeruar sipërfaqet me klimë kontinentale në Bullgari, Serbi, Rumani, Maqedoni të Veriut, Shqipëri dhe Greqi.
Vera e tre viteve të fundit në Shqipëri ka rezultuar ndër më të nxehtat e dekadës, duke reflektuar qartë ndikimin e ndryshimeve klimatike në vend. Sipas të dhënave të Sistemit Kombëtar Meteorologjik, muaji korrik gjatë shtatë viteve të fundit (2017–2024) ka shënuar një devijim mesatar prej +2.9°C mbi normën shumëvjeçare (1961–1990), ndërsa në disa zona ky devijim ka arritur deri në +4.4°C. Gushti 2024 ishte edhe më i nxehtë, duke regjistruar një rritje mesatare prej +3.15°C mbi normën.
Përveç temperaturave të larta, reshjet kanë pësuar një rënie të ndjeshme. Në shtatë vitet e fundit sipas IGJEO, ato kanë rënë mesatarisht me 6.4%, ndërsa vetëm në korrikun e vitit 2024 u shënua një defiçit i madh, me 48% më pak reshje se mesatarja shumëvjeçare. Numri i ditëve me shi në shtatë vitet e fundit gjithashtu ka rënë ndjeshëm, me një ulje prej rreth 13.8%. /Skyweb.al
