Agjencia për Zhvillimin Bujqësor dhe Rural ka publikuar listën me 1277 përfituesit e parë të skemës së mbështetjes me naftë për punime të mekanizuara në bujqësi. Përzgjedhja e këtyre fermerëve është bërë në bazë të aplikimeve të kryera në platformën e-Albania, ku aplikantët kanë vetëdeklaruar kulturat bujqësore të mbjella ose të planifikuara për mbjellje. Çdo parcelë e deklaruar është shoqëruar me dokumentacionin përkatës të pronësisë ose të përdorimit, si dhe me të dhënat për kulturën që është ose do të mbillet në atë sipërfaqe.
Mbështetja financiare për fermerët është e përcaktuar në bazë të një vendimi qeverie dhe ndryshon sipas llojit të kulturës bujqësore. Shuma maksimale që mund të përfitohet arrin deri në 186 euro për hektar. Për bimët e arave, mbështetja varion nga 18,582 lekë për hektar për kulturat pranverore si misri, fasulet, luledielli, soja dhe sorgumi, në 12,714 lekë për hektar për bimët e lashta si gruri, tërshëra, thekra, elbi, bimët foragjere njëvjeçare dhe ato industriale si patatja, duhani, panxhari dhe pambuku. Ndërkohë, për bimët foragjere shumëvjeçare dhe ato aromatike-mjekësore, mbështetja është 8,802 lekë për hektar.
Në sektorin e drufrutorëve, kultivimi i mollës mbështetet me 18,582 lekë për hektar, ndërsa për frutat e tjera, ullirin, agrumet dhe vreshtat jepen 15,648 lekë për hektar. Për kulturat si arra, bajamet, lajthitë dhe gështenjat jepen 13,692 lekë për hektar, ndërsa për fidanët e të gjitha bimëve farore, bërthamore dhe arrore mbështetja arrin në 16,626 lekë për hektar.
Për sa i përket perimeve, pagesa për naftën është 14,670 lekë për hektar për të gjitha llojet e perimeve të fushës në sezonin e parë, përfshirë shalqirin, pjeprin dhe luleshtrydhen, ndërsa për perimet e serës në sezonin e parë jepen 16,626 lekë për hektar.
Fermerët mund të përfitojnë deri në 100% të vlerës për sipërfaqet deri në 10 hektarë. Për sipërfaqet mbi këtë kufi, mbështetja reduktohet në 50%, me përjashtim të atyre që kanë aplikuar si “Grup fermerësh” ose si “Shoqëri e Bashkëpunimit Bujqësor” (SHBB), të cilët përfitojnë të plotë vlerën.
Të gjitha aplikimet e shpallura fituese kanë kaluar më parë në një kontroll të plotë administrativ për të verifikuar përputhshmërinë e vetëdeklarimeve me dokumentacionin përkatës për parcelat, sipërfaqet dhe kulturat bujqësore. /Skyweb.al
