Kreu i Entit Rregullator të Energjisë, Petrit Ahmeti, la të hapur mundësinë për një ulje të çmimit të energjisë elektrike, në varësi të performancës financiare të Operatorit të Shpërndarjes së Energjisë Elektrike (OSHEE).
Gjatë shqyrtimit të Raportit Vjetor 2024 në Komisionin për Burimet Natyrore, Infrastrukturën dhe Zhvillimin e Qëndrueshëm, Ahmeti tha se dinamika e sektorit energjetik po ndikohet nga disa faktorë, përfshirë rritjen e kapaciteteve të reja prodhuese dhe përpjekjet për uljen e humbjeve në rrjet.
Ai theksoi se ulja e kostove operative dhe përmirësimi i performancës financiare të OSHEE-së janë elementë që do të përcaktojnë nëse do të ketë hapësirë për rishikim të tarifave në vitin e ardhshëm.
Në seancë u diskutuan gjithashtu çështje që lidhen me zhvillimet në sektorin e gazit natyror, përfshirë ecurinë e projektit të gazifikimit të Korçës dhe funksionalizimin e TEC-it të Vlorës, të cilat konsiderohen hapa të rëndësishëm për diversifikimin e burimeve të energjisë në vend.
Krahas analizës financiare, deputetët vunë në dukje se Raporti i Veprimtarisë Vjetore të ERE për vitin 2024 është paraqitur me vonesë, përtej afatit ligjor prej gjashtë muajsh nga mbyllja e vitit, çka pritet të sjellë edhe shtyrje në miratimin e Rezolutës për vitin 2025.
Pjesë e diskutimeve ishin edhe propozimet për përmirësimin e rregulloreve që lidhen me çmimin e energjisë për vetëprodhuesit, hartimin e një strategjie afatmesme për eficiencën energjetike dhe forcimin e mekanizmave për mbrojtjen e konsumatorëve.
Megjithatë, të dhënat e raportit tregojnë se OSHEE nuk po arrin të përmbushë objektivat për uljen e humbjeve teknike në rrjet, një problem që vijon të rëndojë performancën e sektorit dhe të kufizojë mundësitë për një ulje të qëndrueshme të çmimit të energjisë. /skyweb.al
