Më në fund, pas më shumë se një viti nga shpërthimi i skandalit, ekspertë të specializuar mbërritën në zonën industriale të Porto Romanos në Durrës për të marrë mostra nga 102 kontejnerët me rreth 2,100 tonë mbetje të dyshuara toksike, të sekuestruara prej një viti me urdhër të Prokurorisë.
Procesi po zhvillohet me kujdes maksimal, pasi mbetjet kanë qëndruar gjatë në ambient të hapur dhe dyshohet se janë ngurtësuar, duke e bërë marrjen e kampionëve më të ndërlikuar.
Sipas burimeve zyrtare, mostrat do të dërgohen në një laborator të specializuar në Itali, ku do t’i nënshtrohen analizave të detajuara për të përcaktuar përbërjen kimike dhe nivelin e mundshëm të toksicitetit.
Rezultatet pritet të jenë vendimtare për hetimin penal ndaj kompanisë “Kurum International”, nën akuzë për eksport të paligjshëm të mbetjeve të rrezikshme.
Skyweb.al raportoi më herët se për më shumë se 11 muaj, kontejnerët qëndrojnë të mbyllur në Porto Romano pa u analizuar, ndërsa Prokuroria e Durrësit nuk ka kryer as aktet bazë të hetimit, si marrja e mostrave me zinxhir prove apo përcaktimi shkencor i përbërjes.
Hetimet janë zvarritur dhe sabotuar, pavarësisht se ngarkesa është kthyer nga jashtë vendit pas dyshimeve për mbetje të rrezikshme.
Mbetjet kishin dalë nga furrat e shkrirjes së çelikut të kompanisë Kurum, ndërsa në dokumentet doganore janë deklaruar si “oksid hekuri”, me qëllim shmangien e përkufizimit ligjor si mbetje toksike.
Si plasi skandali
Në gusht të vitit të kaluar, autoritetet tajlandeze refuzuan hyrjen e një ngarkese me “material riciklues” të dërguar nga Shqipëria, pasi testet paraprake zbuluan elementë të rrezikshëm.
Ngarkesa u rikthye në Portin e Durrësit, ku më pas u sekuestrua me urdhër të Prokurorisë.
Në total, 102 kontejnerë me mbi 2,100 tonë mbetje mbërritën sërish në vend, por që prej asaj kohe nuk është kryer asnjë analizë e plotë laboratorike, deri në ndërhyrjen e fundit të autoriteteve.
Rezultatet e analizave në Itali do të përcaktojnë nëse mbetjet janë toksike dhe nëse përbëjnë rrezik për mjedisin dhe shëndetin publik, duke hapur rrugën për ndjekje penale ndaj personave përgjegjës dhe kompanive të përfshira, Kurum International dhe Sokolaj Shpk. /skyweb.al
