Bursa Shqiptare e Energjisë Elektrike (ALPEX) ka hapur tenderin për ndërtimin e një platforme të re elektronike që do të bashkojë tregjet e energjisë midis Shqipërisë dhe Kosovës.
Projekti, me një fond limit prej 300 milionë lekësh, synon të krijojë një sistem modern, transparent dhe të sigurt për tregtimin e energjisë në dy vendet.
Sipas dokumenteve të publikuara në Agjencinë e Prokurimit Publik, platforma do të jetë një sistem elektronik i centralizuar, që do të menaxhojë të gjitha proceset e tregtimit dhe klerimit të energjisë për zonat e ofertimit të Shqipërisë dhe Kosovës.
Qëllimi është të garantohet transparencë, saktësi dhe siguri në çdo hap të procesit tregtar.
Platforma do të mundësojë tregtimin e energjisë në tregun “ditë përpara” (Day Ahead) dhe në tregun “brenda ditës” (Intra-Day), duke lejuar bashkimin ose ndarjen e tregjeve sipas nevojës. Teknologjia e re do të sigurojë ekzekutim të shpejtë të transaksioneve, vonesë minimale dhe anonimitet mes palëve që kryejnë tregtimet.
Sistemi do të ketë mbrojtje të lartë ndaj çdo ndërprerjeje, me një platformë rezervë që do të aktivizohet automatikisht në rast defekti, për të garantuar vazhdimësinë e tregtimit.
Po ashtu, do të përfshihen kontrolle të forta sigurie dhe autorizimi, për mbrojtjen e të dhënave dhe integritetin e procesit.
Përmes kësaj platforme, anëtarët e bursës do të kenë akses në kohë reale në çmimet, urdhërporositë dhe të dhënat e tregut, si dhe do të ndërveprojnë me sistemin e klerimit që do të përpunojë automatikisht rezultatet dhe limitet e tregtimit.
Sipas të dhënave të ALPEX, në shtatë muajt e parë të këtij viti janë tregtuar rreth 986 mijë megavat/orë energji, me një vlerë totale prej 116 milionë eurosh.
Platforma e re pritet të forcojë integrimin energjetik mes Shqipërisë dhe Kosovës dhe ta afrojë tregun rajonal me standardet europiane të funksionimit. /skyweb.al
