Në një kohë kur konsumatorët kërkojnë gjithnjë e më shumë përvoja të reja dhe të rafinuara, disa restorante elitare po i japin ujit të pijshëm një vend të nderuar në tryezë – jo thjesht si një shoqërues i vakteve, por si pjesë qendrore e përvojës kulinare. Kjo nuk është më çështje vetëm e zgjedhjes mes ujit me ose pa gaz, tani po flitet për ujë nga akullnajat e lashta, burime vullkanike, apo zona të mbrojtura natyrore, të servirura me kujdes dhe të shoqëruara me përshkrime të detajuara për origjinën dhe përbërjen minerale.
Në restorantin “Gëen” në Los Angeles, klientët mund të porosisin një menu të plotë uji, duke provuar shishe që vijnë nga vende si Armenia, Franca apo Australia. Një kliente që kishte ardhur për një darkë të veçantë, zgjodhi ta shoqëronte ushqimin me katër lloje të ndryshme uji, një eksperiencë që mund të krahasohet me degustimin e verërave. Pronari i restorantit, një kuzhinier i njohur, thotë se vetëm nga shitja e ujit, restoranti i tij gjeneron mbi 100 mijë dollarë në vit.
Pse ky interes për diçka kaq të zakonshme si uji? Përgjigjja qëndron në mënyrën se si e perceptojmë luksin dhe përvojat unike. Me një rritje të interesit për alternativa pa alkool dhe një vëmendje të shtuar ndaj shëndetit, shumë klientë kërkojnë opsione që nuk përfshijnë verë ose kokteile, por duan sërish diçka të veçantë. Këtu hyn në lojë uji “premium”, i cili shërbehet shpesh me shpjegime për nivelin e kripërave minerale, profilin e shijes dhe burimin natyror.
Ekspertët e specializuar për ujin, të ngjashëm me somelierët e verës ndihmojnë klientët të zgjedhin llojin e duhur për çdo vakt. Ata flasin për teksturën, freskinë, përmbajtjen e karbonatit apo shijen që lë pas. Për shembull, uji nga Islanda mund të ketë një shije të butë dhe të pastër, ndërsa ai nga Italia jugore ka më shumë minerale dhe një shije më të rëndë, që shkon mirë me ushqime të pasura.
Sigurisht, jo të gjithë janë të bindur. Disa e shohin këtë trend si një shfaqje të ekzagjeruar të luksit modern dhe konsumizmit të pakuptimtë, sidomos kur një shishe uji shitet për 95 dollarë. Ka gjithashtu shqetësime për ndikimin mjedisor të transportimit të shisheve të ujit nëpër botë për hir të një përvoje “ekskluzive”.
Megjithatë, restorantet që po përqafojnë këtë trend thonë se po u ofrojnë klientëve diçka më shumë sesa thjesht një vakt, një histori, një rrëfim natyror dhe një përvojë multisensoriale. Dhe për shumë prej tyre, kjo përbën një arsye të mjaftueshme për të paguar një çmim të kripur për një gotë uji.
Përshtatur nga Wall Street Journal
/Skyweb.al
