Qytetarët që udhëtojnë çdo ditë nga Kamza drejt Tiranës dhe anasjelltas do të përballen me një rritje të re të çmimit të biletës së transportit publik.
Nga data 1 nëntor, çmimi i biletës do të kalojë nga 40 në 50 lekë, ndërsa abonetë mujore do të shkojnë nga 1200 në 1400 lekë.
Operatori i linjës i është drejtuar Bashkisë Kamëz me një kërkesë zyrtare për ndryshimin e tarifave, duke argumentuar vendimin me rritjen e kostove të karburantit dhe shpenzimeve operative.
Pas shqyrtimit të kërkesës nga Drejtoria e Transportit dhe komisionet përkatëse të Këshillit Bashkiak, vendimi është miratuar me votim, duke i hapur rrugë zbatimit të tarifave të reja nga fillimi i muajit.
Rritja e çmimit pritet të ndikojë drejtpërdrejt në buxhetin e përdoruesve të transportit publik, një pjesë e konsiderueshme e të cilëve e përdorin këtë linjë çdo ditë për në punë apo studime në kryeqytet. /skyweb.al
