Presidenti i Shteteve të Bashkuara, Donald J. Trump, dërgoi një telegram të posaçëm Presidentit të Republikës së Shqipërisë, Bajram Begaj, me rastin e 28 Nëntorit, Ditës së Flamurit.
Në mesazhin e tij, Trump përcjell urimet për popullin shqiptar dhe riafirmon partneritetin e qëndrueshëm mes dy vendeve.
“Në emër të popullit të Shteteve të Bashkuara, ju dërgoj urimet tona më të mira juve dhe popullit të Shqipërisë ndërsa festoni pavarësinë tuaj”, shkruan Presidenti Trump, duke nënvizuar lidhjet e forta historike dhe bashkëpunimin e konsoliduar mes dy vendeve.
Ai thekson se Shtetet e Bashkuara dhe Shqipëria “gëzojnë një partneritet të fortë të krijuar nga lidhje të ngushta sigurie, ekonomike dhe njerëzore”, duke vlerësuar rolin e Shqipërisë në stabilitetin rajonal dhe bashkëpunimin strategjik.
Në telegram, Trump shprehet se pret “me padurim forcimin e bashkëpunimit tonë mbi prioritetet e përbashkëta, duke përfshirë stabilitetin rajonal, përballjen me organizatat kriminale ndërkombëtare dhe zgjerimin e mundësive dypalëshe të biznesit dhe tregtisë.”
Mesazhi përmbyllet me urimin e Presidentit amerikan për të gjithë qytetarët shqiptarë: “Ju uroj juve dhe popullit të Shqipërisë një Ditë të gëzuar Pavarësie.” /skyweb.al
