nga Skyweb.al
Skema e pensioneve është kthyer në një gropë të thellë dhe ky është realiteti i të paktën 20 viteve të fundit.
Qeveritë kanë tentuar ta reformojnë, por situata është përkeqësuar për shkak të tregut të destabilizuar të punës, nëndeklarimit të punonjësve dhe emigrimit masiv gjatë dekadës së fundit.
Banka e Shqipërisë paralajmëroi së fundmi qeverinë për skemën e pensioneve, ndërsa FMN dhe Banka Botërore e kanë bërë sa herë kanë pasur mundësi.
Qeveria po flet për një reformë, por kahja kryesore duket të jetë rritja e moshës së pensionit, duke ia ngarkuar një pjesë të barrës atyre që presin të dalin në pension.
Pjesën tjetër qeveria synon t’ua ngarkojë bizneseve përmes kontributeve të detyrueshme për sigurimet shoqërore.
Rritja e kontributeve pritet të jetë efekti i parë i rritjes me ligj të pagës minimale në 500 euro në Shqipëri duke nisur nga 1 janari 2026.
Kështu u shpreh Kryeministri Rama në një takim në njësinë nr 2 në Tiranë: “Rroga minimale nga 1 janari do shkojë 500 euro. Nuk do jetë rritje e thjeshtë, por siç e kemi thënë, me premtimin që bëmë para se të merrnim 83 mandate, e themi se në fund të mandatit paga minimale do shkojë 700 euro. Kjo nuk është për administratën, por për sektorin publik dhe privat. Kjo përcaktohet me ligj, se në Shqipëri nuk do ketë pagë nën 500 euro.”
Kjo pritet të rrisë edhe më tepër koston e punës për punëdhënësit, të cilët tashmë jo vetëm që nuk gjejnë punëtorë, por duhet të paguajnë më shumë sigurime për ata që kanë punësuar me çdo përpjekje.
Më herët, Banka e Shqipërisë paralajmëroi edhe rritje të çmimeve të prodhimit për shkak të rritjes së kostos së prodhimit si pasojë e rritjes së pagave, pasi mungon krahu i punës. /skyweb.al
