Elon Musk ka dhuruar 1 milion dollarë për kërkime arkeologjike të mbështetura nga inteligjenca artificiale, të cilat, sipas “The Independent”, mund të ndryshojnë mënyrën se si e kuptojmë Romën e Lashtë.
Donacioni është bërë për “American Institute for Roman Culture” (AIRC), një organizatë që synon të thellojë studimet mbi kulturën greko-romake.
Gjatë ceremonisë së çmimit “Expandere Cotiae Lumennscien” u ndanë 11 grante për projekte që përdorin teknologji të avancuar, përfshirë IA-në. Në një video-mesazh, Musk shprehu interesin e tij të madh për historinë, sidomos për periudhën romake, të cilën e konsideron shtyllë të civilizimit perëndimor. Ai theksoi se inteligjenca artificiale mund të ndihmojë në mbushjen e boshllëqeve historike dhe në krijimin e “një libri të ri historie të bazuar plotësisht në materiale dhe arkeologji antike”.
Projektet e financuara po përdorin IA-në në mënyra të ndryshme inovative. Dronë të pajisur me teknologji inteligjente po realizojnë modele 3D shumë të detajuara të vendeve greko-romake në Jordani, të cilat rrezikohen nga ndryshimet klimatike. Ndërkohë, në Pompei, studiuesit po analizojnë shenjat gjeologjike të pigmenteve për të zbuluar rrugët tregtare të Romës së Lashtë.
Interesi i Musk për këtë periudhë historike është i hershëm dhe i dokumentuar. Ai e ka quajtur veten “Pushtues i Marsit”, ka vlerësuar inxhinierinë romake si një faktor kyç të fuqisë së tyre dhe ka spekuluar shpesh rreth figurave të njohura romake, si Marcus Aurelius. Për të, Roma e Lashtë mbetet një burim i vazhdueshëm frymëzimi.
Këto investime tregojnë se inteligjenca artificiale po bëhet një mjet gjithnjë e më i rëndësishëm në arkeologji, duke hapur rrugën për zbulime që mund të rishkruajnë historinë që njohim sot. /Skyweb.al
