Projektligji i ri për fshirjen e detyrimeve tatimore dhe doganore hap rrugën për anulimin e menjëhershëm të rreth 1 miliardë eurove borxhe, sapo të hyjë në fuqi.
Ministri i Financave, Petrit Malaj, konfirmoi në Komisionin e Ligjeve se vetëm borxhet e krijuara para vitit 2014 kapin vlerën 100 miliardë lekë, ndërsa deri në fund të 2024-ës borxhi tatimor ka arritur në 160 miliardë lekë.
Sipas të dhënave zyrtare, nga kjo manovër fiskale do të përfitojnë rreth 202 mijë tatimpagues, individë dhe biznese, që rezultojnë me detyrime të pambledhura ndër vite.
Ministri Malaj prezantoi paketën fiskale me 8 projektligje për vitin 2026, duke theksuar se “kjo paketë nuk rrit taksat, por thjeshton sistemin dhe mbështet sektorët prioritarë”. Në qendër qëndron ajo që qeveria e quan “Paqe Fiskale” dhe jo “amnisti”, ndonëse në praktikë efekti është i njëjtë për borxhet e vjetra.
Sipas ministrit, fshirja automatike do të prekë të gjitha detyrimet më të vjetra se 10 vite, ndërsa për borxhet nga viti 2015 deri në 2024 parashikohen ulje deri në 50% të principalit, nëse paguhen brenda qershorit 2026, ose 25% ulje deri në dhjetor 2026.
Për detyrimet deri në 5 vite, fshihen gjobat dhe kamatëvonesat kundrejt shlyerjes së principalit brenda vitit.
Malaj kujdese që të mos e quajë “amnisti”
“Ne nuk falim përgjegjësi penale dhe nuk ofrojmë imunitet. Thjesht mbyllim kapitullin e borxheve të parashkruara, për t’u dhënë një shans të fundit debitorëve para se të nisin masat shtrënguese”.
Një tjetër pjesë e paketës është “Marrëveshja e Paqes”, që lejon bizneset të rivlerësojnë pasqyrat e 3 viteve të fundit duke paguar tatim fitimi me normë të reduktuar 5% mbi rritjen e deklaruar të fitimit tatueshëm.
Pas kësaj periudhe, qeveria paralajmëron se do të vijojë me bllokime llogarish, sekuestro e shitje të aseteve për mbledhjen me forcë të detyrimeve.
Ndërkohë që qeveria e shet si reformë të drejtë dhe pragmatike, opozita e cilëson një falje masive borxhesh për të zgjedhur fitues e humbës me dorë, ndërsa ekspertët e financave paralajmërojnë se skema mund të inkurajojë sërish mos-pagesat, duke krijuar pritshmëri të re për një “paqë tjetër fiskale” pas disa vitesh. /skyweb.al
