Vera konsiderohet gjerësisht si periudha më e përsosur për pushime në plazh, shkruan Francesca Ferri në një artikull të botuar në të përditshmen italiane “Wom Travel”. Muaji korrik sjell ditë të gjata me diell dhe temperatura të ngrohta që ftojnë për t’u zhytur në ujëra të kthjellta, ndërsa destinacionet turistike mbeten të gjalla, por ende pa flukset e mëdha të vizitorëve që karakterizojnë gushtin. Ky ekuilibër ideal e bën korrikun momentin më të mirë për të zbuluar zonat më të bukura bregdetare të Mesdheut dhe vende të tjera përtej tij.
Udhëtarët që zgjedhin të lëvizin në gjysmën e parë të muajit mund të përfitojnë nga çmime më të favorshme, plazhe më pak të mbushura dhe kushte të shkëlqyera për pushime. Europa ofron një gamë të jashtëzakonshme destinacionesh për çdo shije, nga ishuj të egër dhe të paprekur, te brigje të njohura për jetën e natës dhe atmosferën festive. Për ata që preferojnë relaks total, aventura, romancë apo muzikë dhe festa deri në agim, nuk mungon asnjë mundësi.
Në këtë kuadër, revista italiane e udhëtimeve “Wom Travel” ka publikuar listën e 12 destinacioneve më të mira evropiane për pushime verore në vitin 2026 dhe surpriza më e këndshme vjen nga Shqipëria: Riviera Shqiptare është renditur në vend të parë. Për turistët që kërkojnë një vend të ri, me ujëra të pastër si në Karaibe dhe çmime jashtëzakonisht konkurruese, Riviera e Jugut të Shqipërisë mbetet një zbulim i papritur dhe mahnitës. Me pamje spektakolare mbi detin Jon, kjo zonë ofron plazhe dhe peizazhe që rivalizojnë ato të Greqisë fqinje, por bashkë me një atmosferë më autentike dhe më pak të mbushur me turistë.
Korriku është muaji ideal për të eksploruar këtë pjesë të vendit, pasi moti i ngrohtë dhe ditët me diell e bëjnë përvojën edhe më të këndshme. Pikat më të njohura të Rivierës janë Saranda, qendra më e gjallë turistike, dhe Ksamilit, një destinacion që prej vitesh ka fituar famë për ujërat e kristalta dhe ishujt e vegjël të arritshëm me not ose me varkë, të cilët shumë ekspertë i kanë pagëzuar si “Maldivet e Evropës”. Më përgjatë rrugës bregdetare që zbret nga Qafa e Llogorasë, shtrihet një varg plazhesh të mrekullueshme si Dhërmiu, Jala dhe Himara, të vendosura në gjire të rrethuara nga gjelbërimi dhe natyra e paprekur.
Përveç detit, Riviera Shqiptare ofron edhe pasuri kulturore e historike, si parku arkeologjik i Butrintit, i cili është pjesë e Trashëgimisë Botërore të UNESCO-s. Ky kombinim mes natyrës, historisë dhe mikpritjes e bën Shqipërinë një destinacion që po zhvillohet me ritme të shpejta, por që ka arritur të ruajë shpirtin e vet autentik. Për këtë arsye, vendi konsiderohet si një zgjedhje ideale për pushime cilësore dhe njëkohësisht ekonomike.
Lista e plotë e “Wom Travel” për vitin 2026 përfshin, pas Rivierës Shqiptare, edhe destinacione të tjera të njohura si Lampedusa, Favinjana dhe Ishujt Aeolianë në Siçili, arkipelagun La Maddalena në Sardenjë, Ishujt Balearik në Spanjë, Korsikën dhe Rivierën Franceze, Mikonosin në Greqi, Malin e Zi, Bregun e Bruztë në Turqi dhe Algarve në Portugali. Mes gjithë këtyre vendeve të mrekullueshme, fakti që Riviera Shqiptare zë vendin e parë dëshmon edhe një herë për potencialin dhe bukurinë e saj, duke e bërë Shqipërinë një prej yjeve më në ngjitje të turizmit evropian. /Skyweb.al
