Enti Rregullator i Energjisë ka miratuar një udhëzim të ri që detyron përfshirjen e më shumë të dhënave në faturat mujore të energjisë elektrike. Të gjitha faturat, sipas rregullave të reja, duhet të përmbajnë identifikimin e plotë të konsumatorit, kategorinë përkatëse dhe të dhëna të detajuara lidhur me vetëprodhimin e energjisë apo instalimin e pajisjeve për karikimin e automjeteve elektrike.
Konsumatoret do të kategorizohen sipas kuadrit ligjor në familjarë, biznese të lidhura në nivelin 0.4 kV që furnizohen nga Furnizuesi Universal, familjarë me konsum nën 700 kW, konsumatorë të Furnizuesit të Mundësisë së Fundit, objekte kulti, furra buke apo prodhues mielli, stacione karikimi për automjete elektrike, vetëprodhues me burime të rinovueshme dhe ujësjellës-kanalizime të lidhura në tension 35/20/10/6 kV. Furnizuesit janë të detyruar të përditësojnë sistemet e faturimit elektronik për të reflektuar këto kategori.
Sipas vendimit të Bordit të ERE të datës 13 nëntor, kompanitë furnizuese do të raportojnë çdo tre muaj listën e konsumatorëve që kanë instalime vetëprodhimi ose pajisje karikimi për automjete elektrike. Kjo bëhet për të garantuar transparencë dhe monitorim të saktë të rrjetit.
Udhëzimi përcakton se konsumatorët ekzistues që kanë stacione karikimi me fuqi mbi 11 kW të lidhura në 0.4 kV, por nuk disponojnë kontratë furnizimi të dedikuar, do të pajisen automatikisht me një kontratë të re nga Furnizuesi i Shërbimit Universal, pa kosto shtesë për instalimin e sistemeve të matjes. E njëjta procedurë do të zbatohet për çdo konsumator të ri që aplikon për pika karikimi me të njëjtin kapacitet.
Udhëzimi i ri hyn në fuqi pas publikimit në Fletoren Zyrtare dhe do të zbatohet në faturimet që nisin nga muaji dhjetor 2025, duke sjellë transparencë më të madhe dhe kategorizim më të saktë në tregun e energjisë. /skyweb.al
