OSSH Tiranë ka shpallur hapjen e garës për ndërtimin e dy fiderave te rinj nga n/stacioni Kashar 110/20 kV dhe rikonstruksion i kabinave ekzistuese, me fond limit prej 87 milionë e 225 mijë lekë.
Referuar dokumentit në Agjencinë e Prokurimit Publik, faza e parë e projektit shtrihet nga nënstacioni 110/20 kv Kashar duke vazhduar deri në afërsi të Bulevardit Blu në Kamëz dhe duke mbuluar një gjatësi totale prej rreth 5.4 km.
Investimi është planifikuar të kryhet sepse zona ka një trend të lartë të rritjes së kërkesës për energji; ka ngarkesa te larta, si dhe paraqiten defekte të shpeshta. Projekti përfshin një zonë gjeografike prej 20 km² dhe rreth 10.000 abonentë familjarë dhe privatë. Fiderat ekzistues aktualisht janë në vlerat nominale te ngarkesave.
Zona e përfshirë nga projekti është pjesë e Bashkisë Kamëz, e zhvilluar me ndërtime ekzistuese para viteve ’90, si dhe me ndërtime të reja. Abonentëve u mundësohet furnizimi pas realizimit të projektit nga dy linja të tjera të reja 20 kV, duke rritur shkallën e sigurisë dhe cilësisë së furnizimit.
Rrjeti elektrik në këtë zonë ka nevojë për përmirësime, pasi fuqia e instaluar në fidera është më e madhe se kapaciteti furnizues i tyre, andaj del e nevojshme rritja e cilësisë së shpërndarjes së energjisë elektrike.
Sipas dokumentit, ndërtimi i rrjetit të ri të tensionit të mesëm 20 kv, do të risë cilësinë e energjisë së shpërndarë, do të ulë numrin e defekteve, si dhe do të garantojë siguri në shfrytëzimin e tij./tvscan
