Në korrik të këtij viti, një 17-vjeçar nga lindja e Ukrainës udhëtoi rreth 800 kilometra drejt qytetit perëndimor Rivne për të marrë një bombë dhe një telefon të fshehur në një park. Atij i ishte premtuar një pagesë prej 2,000 dollarësh për të vendosur bombën në një furgon të shërbimit të rekrutimit ushtarak të Ukrainës.
“Kur po lidhja telat, mendova se mund të shpërthente aty për aty. Mendova se mund të vdisja,” i tha ai BBC-së.
Vlad, emër i ndryshuar për të ruajtur anonimitetin është një nga qindra fëmijë dhe adoleshentë që, sipas autoriteteve ukrainase, janë rekrutuar online nga Rusia dhe janë paguar për të kryer akte sabotimi dhe sulme kundër Ukrainës. Ai thotë se i ishte kërkuar të përgatiste telefonin për transmetim të drejtpërdrejtë, në mënyrë që personi që e udhëzonte të aktivizonte bombën në distancë.
Por shërbimi i sigurisë ukrainase e kishte zbuluar planin dhe e ndaloi sulmin. Tani, 18-vjeçari ndodhet në paraburgim në qendrën e sigurisë së lartë të Rivnes, duke pritur gjyqin për akuza terrorizmi që mund t’i sjellin deri në 12 vite burg.
Ai pranon se veprimi i tij mund të kishte shkaktuar viktima. “E mendova këtë. Por askush nuk i pëlqen oficerët e rekrutimit,” thotë ai me indiferencë.
Sipas SBU-së, gjatë dy viteve të fundit janë identifikuar mbi 800 ukrainas të rekrutuar nga Rusia, mes tyre 240 të mitur, disa vetëm 11 vjeç. Ekspertja e sigurisë kibernetike, Anastasiia Apetyk, thotë se është në dijeni edhe të rasteve të fëmijëve 9 ose 10 vjeç që janë kontaktuar nga rekrutuesit rusë.
Zëvendësshefi i policisë kombëtare të Ukrainës, Andriy Nebytov, thekson se kjo është një strategji e qëllimshme: “Ata kërkojnë njerëz vulnerabël, të manipulueshëm. Fëmijët nuk e kuptojnë plotësisht pasojën e veprimeve të tyre.”
SBU thotë se platforma kryesore ku rekrutohen fëmijët është Telegram, por raste janë raportuar edhe në TikTok e deri te platformat e videolojërave. Sipas autoriteteve, motivimi kryesor është paraja, jo simpatia për Rusinë.
