SPAK ka reaguar zyrtarisht pas masës së GJKKO-së ndaj zv.kryeministres dhe ministres së Infrastrukturës Belinda Balluku, të cilës i është komunikuar pezullimi nga detyra dhe ndalimi i daljes jashtë shtetit.
Hetimet e Prokurorisë së Posaçme lidhen me dy procedura të rëndësishme prokurimi: tunelin e Llogarasë dhe lotin 4 të Unazës së Jashtme të Tiranës.
Sipas SPAK, Balluku dyshohet se ka orientuar dhe ndjekur personalisht të dy tenderat nga faza përgatitore deri në shpalljen e fituesit, duke krijuar avantazhe të padrejta për operatorët ekonomikë të paracaktuar. Në të dyja rastet, sipas hetimeve paraprake, fituesit janë caktuar paraprakisht në bashkëpunim me zyrtarë të Autoritetit Rrugor Shqiptar dhe të Ministrisë së Infrastrukturës.
Përveç Ballukut, masa sigurie janë caktuar edhe për zyrtarë të tjerë. Gentian Gjyli dhe Erald Elezi janë vendosur në “arrest shtëpie”, ndërsa Evis Berberi, ish-drejtori i ARRSH, është një nga emrat kyç të hetimit. SPAK thekson se shkeljet prekin barazinë e pjesëmarrësve në tendera, konfliktin e interesit dhe rregullat themelore të prokurimit publik, duke shtrirë përgjegjësinë në disa nivele vendimmarrjeje.
Gjykata e Posaçme ka firmosur pezullimin e Ballukut nga funksionet e saj si zv.kryeministre dhe ministre, si edhe ndalimin e lëvizjes jashtë vendit. Ndërkohë, hetimi mbetet i hapur dhe është mbështetur në prova digjitale, metoda speciale hetimore dhe deklarime të zyrtarëve të përfshirë.
SPAK njofton se veprimet hetimore për këto dy tendera strategjikë do të vijojnë, ndërsa akuzat aktuale përfshijnë “shkeljen e barazisë së pjesëmarrësve në tendera”, kryer në bashkëpunim – një vepër që mund të marrë zhvillime të tjera me thellimin e procedimit penal. /skyweb.al
