Masa të reja ndëshkuese parashikohen për subjektet që nuk respektojnë detyrimet mbi sistemet e menaxhimit të energjisë dhe auditimet energjetike, sipas projektligjit të ri “Për eficiencën e energjisë”, i cili është hapur për konsultim publik nga Ministria e Infrastrukturës dhe Energjisë. Drafti propozon gjoba që shkojnë deri në 1.5 milionë lekë për konsumatorët e mëdhenj të energjisë, njësitë e qeverisjes vendore dhe qendrat e të dhënave që nuk zbatojnë kërkesat ligjore.
Në veçanti, moskryerja e auditimeve energjetike ose mungesa e certifikimit të sistemit të menaxhimit të energjisë sipas standardit ISO 50001 mund të penalizohet me gjobë deri në 1 milion lekë. Po ashtu, subjektet që klasifikohen si konsumatorë të mëdhenj të energjisë, përfshirë institucionet publike dhe bizneset private, si edhe bashkitë, detyrohen të kenë të paktën një menaxher energjie. Ky i fundit ka përgjegjësi mbi funksionimin dhe mirëmbajtjen e pajisjeve që konsumojnë energji, optimizimin e përdorimit të saj dhe zbatimin e praktikave për kursim dhe eficiencë. Mosangazhimi i një menaxheri energjie sërish dënohet me gjobë deri në 1 milion lekë.
Sanksione më të ashpra parashikohen për auditorët energjetikë të certifikuar, të cilët, në rast se shkelin standardet profesionale apo manipulojnë të dhëna teknike, mund të gjobiten deri në 1.5 milion lekë dhe t’u pezullohet certifikata deri në tre vite.
Projektligji vendos edhe detyrime të reja për qendrat e të dhënave, të cilat duhet të hartojnë plane veprimi për kursimin e energjisë dhe të dorëzojnë raportime periodike pranë autoritetit përgjegjës. Moszbatimi i këtyre kërkesave mund të sjellë gjoba deri në 1 milion lekë. /Skyweb.al
