Ish-ministri i Drejtësisë, Ylli Manjani, reagoi ashpër në Facebook pas qarkullimit të një fotografie të Ervis Berberit, e cila u publikua nga Gazmend Bardhi. Sipas Manjanit, imazhi – i bërë në Pallatin e Brigadave dhe jo në një mjedis shtëpie – del nga një celular i sekuestruar nga SPAK, por nuk është pjesë e asnjë fashikulli hetimor apo dosjeje gjyqësore.
Manjani ngre pikëpyetje të forta mbi mënyrën se si fotoja ka dalë nga memorja e telefonit të Berberit dhe ka përfunduar në duart e Bardhit. Ai thekson se imazhi nuk ka vlerë provuese dhe për këtë arsye nuk gjendet në asnjë dokument zyrtar të çështjes, duke e cilësuar publikimin e tij si nxitje të “drejtësisë popullore dhe politike”.
Në qëndrimin e tij, ish-ministri e quan “akt flagrancë” daljen e fotos dhe deklaron se përgjegjësinë e mban prokurori i çështjes, të cilin e akuzon për shkelje të të drejtave dhe të dhënave personale. Sipas tij, sjellja e prokurorëve është “anti-kushtetuese dhe anti-ligjore”, duke thelluar një fenomen që prej kohësh e denoncon publikisht.
Manjani gjithashtu sulmon Gazmend Bardhin, të cilin e akuzon se po përdor të dhëna të dala nga SPAK për të mbuluar humbjen elektorale në Fier, por thekson se “përhapja e rrjedhjeve nuk të bën fitues në zgjedhje”.
Në përfundim, ish-ministri paralajmëron se rasti i fotos së Berberit është një tjetër provë e një praktike që, sipas tij, dhunon personin dhe drejtësinë.
REAGIMI I PLOTË
Kjo foto e bërë nga Ervis Berberi, duket qartë që nuk është mjedis shtëpie. Ky mjedis gjendet në Pallatin e Brigadave.
Por pavarësisht kësaj, pyetja themelore që kam është kjo:
Si gjendet kjo foto në dorë të Gazmend Bardhit, nga celulari i sekuestruar e Ervis Berberit?!
Në ç’rrethana ligjore, apo proçedurale kjo foto, e cila nuk është pjesë e asnjë fashikulli gjykimi dhe, nuk gjendet në asnjë dosje të asnjërit prej të pandehurve, ka dalë nga memoria e celularit të Ervis Berberit dhe gjendet në dorë të Gazit?!
Shikoni, kjo foto në vetvete nuk shërben si provë e as si indicie për hetimet që janë në proçes. Ndaj dhe nuk gjendet në asnjë dokument zyrtar të dosjeve me akuzat e bëra.
Kjo foto provon vetëm një gjë: që SPAK nxit drejtësinë popullore dhe politike ndaj personave që ka nën hetim. Huq i përhershëm ky…😡
Dalja e kësaj foto në publik, përbën akt flagrance ndaj prokurorit të çështjes, i cili duhet të japë llogari për këtë gjë.
Ai është rojtari i të dhënave hetimore. Askush tjetër, përveç atij nuk ka përgjegjësi për nxjerrjen në publik e të dhënave personale të personave.
Gaz Bardhi, i cili kërkon të lajë turpin e dështimit politik për humbjen më të thellë në Fier, është i gatshëm të bëjë lajmësin e SPAK të drejtësisë popullore, qoftë dhe me gënjeshtra. Sidoqoftë përhapësi i të dhënave që i jep SPAK, nuk e bën atë fitues në zgjedhje, por temë tjetër kjo.
Përgjegjës ligjor për nxjerrjen e kësaj foto është Prokurori i SPAK.
Ky nuk është thjesht skandal, por sjellje anti kushtetutë e anti ligj nga ana e prokurorëve.
Kam kohë që e denoncoj këtë fenomen. Kjo e sotmja është provë tjetër e kësaj sjellje dhune ndaj personit dhe drejtësisë.
Kaq.
