Biznesmeni Endri Meksi doli nga ambientet e Prokurorisë së Posaçme pas rreth pesë orësh marrjeje në pyetje, në një moment kur ndaj tij janë shtuar denoncimet publike për kërcënime dhe episode të dyshuara intimidimi.
Në një prononcim të shkurtër për gazetarët pas daljes nga SPAK, Meksi deklaroi se pyetjet janë fokusuar te deklaratat që ai ka bërë së fundmi në publik.
“Ishte interesante, u pyeta për ato që kam deklaruar kohët e fundit”, u shpreh ai.
Pronari i televizionit MCN ka deklaruar publikisht në ditët e fundit se ka marrë kërcënime me jetë dhe se ndihet i rrezikuar. Sipas tij, për këtë çështje është bërë edhe kallëzim në polici.
Marrja në pyetje në SPAK vjen vetëm pak ditë pasi në ambientet e një dyqani “MCN Get Connected”, në pronësi të Meksit, u vendos një sasi eksplozivi. Nga shpërthimi nuk pati persona të lënduar, por u shkaktuan dëme materiale.
Ngjarja ngriti pikëpyetje mbi motivet dhe sfondin e incidentit, ndërsa vetë Meksi ka folur publikisht për një klimë presioni dhe kërcënimesh ndaj tij.
