Kryeministri Edi Rama deklaroi sot se pezullimi i ministres Belinda Balluku nga GJKKO ka bllokuar dhjetëra akte që kërkojnë firmën e saj ekskluzive, duke përfshirë edhe procedurën për nisjen e linjës së parë direkte Shqipëri–Kanada, një projekt që do të shënonte fluturimet e para transoqeanike civile nga një aeroport shqiptar.
Tirana International Airport (TIA) ka gati infrastrukturën dhe plani ishte që fluturimet të nisnin në qershor 2026. Por sipas Ramës, pezullimi i Ballukut, që nuk mund të firmosë aktet përkatëse, po e penalizon vendin dhe po rrezikon nisjen e këtij projekti.
Ndërkohë, burime për Skyweb.al bëjnë me dije se negociimet teknike me palën kanadeze kanë përfunduar dhe marrëveshjet janë gati.
Është diskutuar me një kompani kanadeze që ka në dispozicion avionë Airbus A330-200 dhe Airbus A330-300, të cilët mund të kryejnë fluturimet transoqeanike. Megjithatë, për të kaluar në fazën përfundimtare dhe firmosjen e marrëveshjes që hap rrugën e fluturimeve në qershor 2026, kërkohet firma e ministres së linjës, e cila aktualisht është e pezulluar.
Krahas linjës direkte Shqipëri-Kanada, hapi i radhës është nisma për fluturime direkte drejt New York-ut. Kjo do ta kthente Shqipërinë në një qendër të rëndësishme tranziti për rajonin, pasi aktualisht fluturimet transoqeanike përtej Atlantikut nga rajoni ynë kryhen kryesisht nga Athina dhe Beogradi.
Reagimi i Ramës erdhi mes debatit të nisur pas vendimit të GJKKO-së për pezullimin e Ballukut, e cila është marrë e pandehur nga SPAK dhe po hetohet për skandalet me vlerë miliona euro në Tunelin e Llogarasë dhe Unazën e Madhe të Tiranës. Kryeministri e cilëson vendimin absurd dhe thekson se ai cënon funksionimin normal të qeverisë dhe interesin publik.
Rama shtoi se, përveç çështjes së linjës Shqipëri–Kanada, aktualisht janë të bllokuara edhe 36 akte të tjera të Ministrisë së Infrastrukturës dhe Energjisë, përfshirë 18 akte që lidhen me procesin e rindërtimit. Sipas tij, çdo ditë e pezullimit zgjeron listën e punëve të bllokuara. /skyweb.al
