Dubai ka shtuar një tjetër rekord në horizontin e tij, këtë herë pothuajse pa qëllim. Ciel Tower, hoteli më i lartë në botë, është hapur zyrtarisht duke u ngritur 377 metra mbi Dubai Marina. Lartësia e tij mbresëlënëse nuk ishte planifikuar; ajo u rrit natyrshëm teksa projektet u rishikuan dhe rindërtuan disa herë.
“E dinim që donim të krijonim diçka spektakolare,” thotë Rob Burns, CEO i zhvilluesit The First Group. “Por nuk kishim synim të ndërtonim hotelin më të lartë në botë.”
Edhe me këto përmasa rekord, arkitektët e Ciel u detyruan të mendonin me kursim hapësire. Kulla ngrihet nga një truall prej vetëm 3,600 metrash katrorë, pak më e vogël se një fushë futbolli profesionale. Një sipërfaqe modeste për standardet e Dubait. Edhe hyrja e hotelit është luksoze, por larg pritshmërive të një rekord-thyesi në këtë qytet: nuk ka sallone gjigante, statuja apo ujëvara. Në vend të tyre, gjen dritë të butë, linja të harkuara dhe një dizajn që reflekton qartë kufizimet e hapësirës.
“Ishte një projekt shumë sfidues,” thotë arkitekti Jan. “Pronës i mungon forma e rregullt dhe, për një kullë të kësaj madhësie, mund të kishte pasur më shumë hapësirë. Por gjithmonë them se puna më e mirë bëhet kur sfidat janë më të mëdha”, shkruan CNN.
Holli është kompakt sepse duhet të jetë i tillë; madhështia zbulohet ngadalë, kat pas kati, ndërsa ndërtesa fiton lartësi.
Edhe dhomat ndjekin të njëjtin koncept. Ato kanë linja të pastra, ngjyra neutrale dhe një estetikë elegante, jo aq të mëdha sa suitat e zakonshme të resorteve të Dubait. Por pamjet mahnitëse nga dyshemeja në tavan mbi Marina-n, Palm Jumeirah dhe Gjirin Arab e kompensojnë këtë. Me 1,004 dhoma në 82 kate, hoteli hyn në një treg tashmë tejet të mbushur, diçka që Burns e pranon: “Një mijë dhoma është padyshim një sfidë. E dinim këtë që në fillim,” thotë ai. Megjithatë, mbetet shumë optimist për tregun e mikpritjes dhe dallimet që i japin Ciel-it avantazh: “Pamjet 360 gradë, dhomat fantastike, shërbimet dhe ambientet.”
Në katet e sipërme zbulon elementin më karakteristik të kullës: një boshllëk vertikal që Jan e quan “syri i gjilpërës”. Ky element nuk është vetëm estetik — është thelbësor për funksionimin e ndërtesës.
Kullat super të larta si Ciel duhet të përballen me erën. Sa më shumë ngrihet ndërtesa, aq më të forta bëhen rrymat. Edhe në një ditë të qetë, era ndihet teksa kalon përmes hapësirës së hapur. “Nëse kërkon lartësinë, është e shkëlqyer,” shpjegon Jan. “Por duhet të mendosh si ta formësosh ndërtesën për të ulur ngarkesën e erës. Kjo hapje i lejon rrymat të kalojnë përmes kullës.” /Skyweb.al
