Investimet e Huaja Direkte në Shqipëri kanë vijuar rritjen e qëndrueshme gjatë tremujorit të tretë të vitit 2025, duke dhënë sinjale pozitive për klimën e investimeve dhe interesin e kapitalit të huaj në sektorë kyç të ekonomisë.
Sipas të dhënave të Bankës së Shqipërisë, fluksi hyrës i IHD-ve arriti në 449 milionë euro, me një rritje prej 10 për qind krahasuar me të njëjtën periudhë të një viti më parë.
Ky nivel përfaqëson një nga shifrat më të larta të regjistruara ndonjëherë për një tremujor.
Rritja është mbështetur kryesisht nga zgjerimi i injektimit të kapitalit dhe fitimi i riinvestuar, të cilat së bashku kapën rreth 440 milionë euro.
Të dhënat tregojnë se kompanitë e huaja jo vetëm që po hyjnë në tregun shqiptar, por po zgjedhin të zgjerojnë aktivitetin dhe të riinvestojnë fitimet brenda vendit.
Një kontribut shtesë prej 9 milionë eurosh erdhi nga marrëdhëniet e borxhit ndërmjet kompanive të lidhura, një tjetër formë e investimeve direkte që reflekton thellimin e lidhjeve financiare ndërmjet subjekteve të huaja dhe ekonomisë vendase.
Sa i përket shpërndarjes sektoriale, pasuritë e paluajtshme rezultuan sektori më i preferuar, duke tërhequr 31 për qind të totalit të investimeve.
Më pas renditen ndërmjetësimi financiar me 16 për qind, hidrokarburet me 6 për qind, energjetika me 5 për qind dhe komunikacioni me 4 për qind.
Paralelisht, është rritur edhe prania e kapitalit shqiptar jashtë vendit. Investimet e rezidentëve shqiptarë në tregje të huaja arritën në 72 milionë euro, me një rritje vjetore prej 24 për qind, duke reflektuar diversifikimin e bizneseve shqiptare dhe forcimin e kapaciteteve të tyre konkurruese.
Në total, investimet e huaja direkte kanë çuar në një zgjerim neto të detyrimeve të ekonomisë shqiptare me 377 milionë euro, duke përforcuar bazën e financimit afatgjatë.
Të dhënat konfirmojnë se Shqipëria mbetet një destinacion tërheqës për kapitalin e huaj dhe po ruan një ritëm pozitiv të integrimit me tregjet ndërkombëtare. /skyweb.al
