Transfertat personale dhe të ardhurat e punonjësve shqiptarë jashtë vendit arritën rreth 2.1 miliardë euro gjatë vitit 2024, sipas të dhënave të publikuara nga Eurostat.
Shuma përfaqëson një rritje të fortë krahasuar me një vit më parë, duke konfirmuar rolin ekonomik vendimtar që vijojnë të mbajnë emigrantët në mbështetjen e familjeve dhe qarkullimin financiar të vendit.
Nga totali, rreth 1.4 miliardë euro kanë ardhur nga vendet e Bashkimit Europian, ndërsa afërsisht 670 milionë euro nga vendet jashtë BE-së.
Në krahasim me vitin 2023, flukset hyrëse janë rritur me 12 për qind, ose rreth 224 milionë euro më shumë, ndërsa krahasuar me 2022-n rritja arrin në 430 milionë euro.
Transfertat personale përbëjnë pjesën më të madhe të këtyre dërgesave, ndërsa kompensimi i punonjësve përfshin të ardhurat e shqiptarëve që punojnë përkohësisht jashtë vendit përpara zbritjes së detyrimeve fiskale.
Në raport me ekonominë, Shqipëria renditet ndër vendet me varësinë më të lartë nga remitancat në Europë.
Sipas Eurostat, transfertat dhe kompensimi i punonjësve përfaqësojnë 5.1 për qind të PBB-së, duke e renditur vendin të tretin në kontinent pas Bosnjë-Hercegovinës me 7.6 për qind dhe Serbisë me 5.4 për qind.
Rritja e dërgesave lidhet ngushtë me emigracionin e viteve të fundit. Sipas statistikave të BE-së, vetëm gjatë periudhës 2023–2024 janë dhënë rreth 150 mijë leje qëndrimi për shtetasit shqiptarë, më shumë se 70 mijë leje çdo vit.
Lejet për punë kanë pasur zgjerimin më të dukshëm, me rreth 20 mijë shqiptarë që kanë marrë leje pune çdo vit gjatë 2022–2024, kundrejt vetëm 3 deri në 4 mijë lejeve në vit një dekadë më parë.
Kjo rritje e ndjeshme e forcës punëtore shqiptare në vendet e BE-së ka përforcuar flukset financiare drejt vendit.
Sipas OECD, mbi 40 për qind e popullsisë shqiptare jeton sot jashtë vendit, duke përbërë një burim të qëndrueshëm të ardhurash për familjet dhe një faktor kyç në ekonominë shqiptare.
Të dhënat e vitit 2024 tregojnë qartë se remitancat mbeten një shtyllë thelbësore për stabilitetin financiar të Shqipërisë dhe një indikator i drejtpërdrejtë i dinamikës së emigracionit modern. /skyweb.al
