Presidenti amerikan Donald Trump e shpalli fentanilin sintetik si një “armë shkatërrimi në masë”.
“Ne po e klasifikojmë zyrtarisht fentanilin si armë shkatërrimi në masë. Asnjë bombë nuk ka shkaktuar dëmet që po shkakton kjo substancë”, u shpreh Trump gjatë nënshkrimit të urdhrit në Uashington.
Ai theksoi se çdo vit qindra mijëra njerëz humbin jetën si pasojë e abuzimit me fentanilin.
Fentanili është një qetësues shumë i fuqishëm që përdoret në mjekësi për trajtimin e dhimbjeve të forta dhe për anestezi, por përdorimi i tij paraqet rrezik të lartë. Sipas Trump, substanca në vetvete nuk është e dëmshme, por bëhet jashtëzakonisht e rrezikshme kur përzihet me droga të tjera.
Ky opioid ka shkaktuar një krizë të thellë të drogës në Shtetet e Bashkuara. Fentanili është deri në 50 herë më i fuqishëm se heroina dhe, sipas të dhënave qeveritare, mbidozat janë shkaku kryesor i vdekjeve tek amerikanët e moshës 18 deri në 44 vjeç.
“Edhe vetëm disa miligramë mund të jenë vdekjeprurëse”, paralajmërojnë autoritetet. /Skyweb.al
