Qeveria ka nxjerrë për konsultim publik projektligjin për disa shtesa dhe ndryshime në ligjin nr. 34/2019 “Për administrimin e pasurive të sekuestruara dhe të konfiskuara”, duke sjellë dy risi kryesore: përfshirjen e monedhave virtuale në kuadrin ligjor dhe shkurtimin e ndjeshëm të kohës së shitjes së pasurive të sekuestruara.
Sipas dokumentit të publikuar nga Ministria e Brendshme, projektligji synon të adresojë boshllëqet praktike që janë evidentuar gjatë zbatimit të ligjit aktual, veçanërisht në rastet kur objekt i sekuestrimit apo konfiskimit janë pasuri të reja financiare, si kriptovalutat.
Për herë të parë, monedhat virtuale trajtohen qartë si pasuri që mund të administrohen, ruhen dhe shiten nga shteti, përmes rregullave që do të përcaktohen më tej me akte nënligjore të Këshillit të Ministrave.
Një tjetër element kyç i projektligjit është ndërhyrja në aspektin procedural, duke synuar minimizimin e kohës dhe afateve të shitjes së pasurive të sekuestruara dhe të konfiskuara nga Agjencia e Administrimit të Pasurive të Sekuestruara dhe të Konfiskuara.
Qeveria argumenton se proceset aktuale janë të gjata dhe shpesh çojnë në zhvlerësim të pasurive, duke ulur përfitimin financiar për shtetin.
Sipas relacionit shoqërues, përshpejtimi i shitjes së aseteve pritet të sjellë rritje të të ardhurave për buxhetin e shtetit, si dhe për fondet e posaçme që përdoren për shërbime sociale dhe institucionale. Në këtë këndvështrim, ndryshimet ligjore kanë edhe një dimension financiar dhe fiskal, përtej funksionit penal të konfiskimit.
Projektligji parashikon gjithashtu forcimin e bashkërendimit mes organeve të drejtësisë, institucioneve administrative dhe pushtetit vendor në proceset e sekuestrimit dhe konfiskimit, me qëllim shmangien e bllokimeve dhe vonesave që janë konstatuar deri tani.
Dokumenti pranon në mënyrë indirekte se administrimi i pasurive të sekuestruara, veçanërisht i aseteve digjitale si kriptot, ka qenë një sfidë për institucionet, duke e bërë të domosdoshëm një rishikim të kuadrit ligjor ekzistues. Projektligji është tashmë në fazë konsultimi publik dhe pritet të pasurohet me sugjerime përpara se të depozitohet për shqyrtim në Kuvend. /skyweb.al
