Mjetet green po forcojnë praninë e tyre në rrugët e Shqipërisë, duke shënuar një rritje të ndjeshme të flotës elektrike në nivel kombëtar. Të dhënat zyrtare të Drejtorisë së Përgjithshme të Shërbimeve të Transportit Rrugor tregojnë se orientimi i qytetarëve drejt transportit të qëndrueshëm po kthehet në një trend të konsoliduar.
Gjatë periudhës janar–nëntor 2025 janë regjistruar për herë të parë 5.312 mjete All-Electric, një shifër që pasqyron rritjen e interesit për teknologjitë e pastra dhe mjetet miqësore me mjedisin.
Krahasuar me të njëjtën periudhë të vitit 2024, regjistrimet e automjeteve elektrike janë rritur me 82.6 për qind, duke konfirmuar një zgjerim të fortë të këtij segmenti të tregut të automjeteve.
Sipas DPSHTRR, këto të dhëna reflektojnë jo vetëm rritjen e kërkesës për mjete ekologjike, por edhe një ndryshim gradual në kulturën e transportit në vend.
Qytetarët po tregojnë interes më të lartë për alternativa që reduktojnë ndotjen dhe ndikimin mjedisor të transportit rrugor.
Shtimi i automjeteve elektrike në qarkullim konsiderohet një faktor me ndikim të drejtpërdrejtë në uljen e emetimeve të dëmshme dhe përmirësimin e cilësisë së ajrit, veçanërisht në zonat urbane.
Autoritetet vlerësojnë se ky trend përputhet me objektivat e zhvillimit të qëndrueshëm dhe standardet bashkëkohore të transportit të pastër.
Me rritjen e vazhdueshme të mjeteve green, Shqipëria po hedh hapa drejt një sistemi transporti më të qëndrueshëm dhe më miqësor me mjedisin, duke ndërtuar një bazë më të fortë për përmirësimin e cilësisë së jetës dhe mbrojtjen e mjedisit në afatgjatë. /skyweb.al
