Autoriteti i Konkurrencës ka vendosur hapjen e një hetimi paraprak në tregun e transportit detar ndërkombëtar të udhëtarëve që operon përmes porteve të Durrësit dhe Vlorës, pas dyshimeve për mungesë konkurrence dhe aplikim të çmimeve abuzive.
Shkak për nisjen e procedurës është bërë një ankesë e depozituar në qershor të këtij viti, sipas së cilës në portin e Vlorës nga tre tragete që kanë operuar më herët, aktualisht është aktiv vetëm një operator. Sipas ankimuesit, kjo situatë ka sjellë vendosjen e çmimeve të larta për biletat e udhëtarëve.
Fillimisht, Autoriteti i Konkurrencës ka zhvilluar një procedurë monitorimi të tregut në portet e Durrësit dhe Vlorës. Monitorimi është shtrirë në terren pranë ndërmarrjeve Ventouris Ferries SHPK, përmes agjencisë Duni Port Agency, Adria Ferries SHPK dhe Euro Ferries SHPK. Paralelisht, janë kërkuar të dhëna nga Autoriteti Portual Durrës, Autoriteti Portual Vlorë dhe Ministria e Infrastrukturës dhe Energjisë.
Nga analiza e tregut ka rezultuar se në linjën Durrës – Ankona – Durrës operon vetëm ndërmarrja Adria Ferries SHPK me një traget të vetëm, duke zotëruar 100 për qind të tregut në këtë linjë dhe pa konkurrentë të drejtpërdrejtë. Një situatë e ngjashme konstatohet edhe në linjën Vlorë – Brindisi – Vlorë, ku operon vetëm një operator, sërish me kontroll të plotë të tregut.
Ndërkohë, në linjën Durrës – Bari – Durrës, Autoriteti i Konkurrencës ka vërejtur se operatorët aplikojnë tarifa shumë pranë çmimit tavan gjatë sezonit të lartë, me diferenca minimale mes tyre. Po ashtu, rritja dhe ulja e çmimeve nga operatorët ndodh me të njëjtin ritëm dhe në të njëjtën kohë, çka përforcon dyshimet për një sjellje të bashkërenduar.
Duke marrë në konsideratë përqendrimin e lartë të tregut në linjat Durrës – Ankona – Durrës dhe Vlorë – Brindisi – Vlorë, si dhe sjelljen e operatorëve që veprojnë në linjën Durrës – Bari – Durrës, Autoriteti i Konkurrencës vlerëson se ekziston një dyshim i arsyeshëm se veprimet e ndërmarrjeve mund të përbëjnë pengim, kufizim apo shtrembërim të konkurrencës.
Sipas Autoritetit, sjellja e operatorëve dhe agjencive detare Adria Ferries, përfaqësues i AF Agency S.P.A, Duni SHPK si përfaqësuese e Ventouris Ferries dhe Ionnian Island SHPK si përfaqësuese e European Seaways, të cilat tregtojnë bileta drejt porteve italiane me çmime thuajse identike dhe pranë kufirit maksimal të miratuar nga Ministria e Infrastrukturës dhe Energjisë, mund të përbëjë një sjellje të koordinuar në kundërshtim me ligjin.
Hetimi paraprak do të përfshijë periudhën nga 1 janar 2022 deri më 30 qershor 2025 dhe do të synojë verifikimin nëse operatorët kanë shkelur nenet 4 dhe 9 të ligjit nr. 9121, datë 28.07.2013 “Për mbrojtjen e konkurrencës”. /skyweb.al
