Gjatë tremujorit të parë të vitit 2025, numri i pasagjerëve që kanë udhëtuar me linja ajrore ka arritur në 2.083.050, nga 1.909.757 që ishin në të njëjtën periudhë të vitit 2024. Sipas të dhënave të publikuara nga INSTAT, kjo përfaqëson një rritje prej 9,1% në krahasim me një vit më parë.
Në këtë periudhë, në transportin ajror kanë operuar gjithsej 19 shoqëri ajrore, nga të cilat 18 janë të huaja dhe vetëm 1 shoqëri është shqiptare.
Në hapësirën ajrore shqiptare janë regjistruar 65.146 fluturime gjatë tremujorit të parë të vitit 2025. Prej tyre, 79,5% janë fluturime mbikalimi, ndërsa pjesa tjetër janë fluturime që kanë pasur ulje ose ngritje në aeroportet shqiptare.
Në fushën e tregtisë ajrore, volumi i mallrave të transportuara për eksport dhe import gjatë kësaj periudhe arriti në 396 ton, duke shënuar një rritje prej 2,8% krahasuar me tremujorin e parë të vitit 2024.
Megjithatë, importet e mallrave përmes ajrit zënë vetëm 0,02% të volumit të përgjithshëm të importeve në Shqipëri./skyweb.al
