Arlinda Pogaj është liruar nga detyra si drejtuese e Operatorit të Blerjeve të Përqendruara, duke mbyllur një kapitull të rëndësishëm profesional në krye të këtij institucioni.
Në një deklaratë publike, Pogaj shprehet se largohet “me krenari dhe ndërgjegje të qetë”, ndërsa e cilëson drejtimin e OBP-së si privilegj dhe përgjegjësi të jashtëzakonshme.
Ajo thekson se gjatë mandatit të saj, Operatori i Blerjeve të Përqendruara u krijua dhe u konsolidua si institucion, duke marrë rol të rëndësishëm në sistemin e prokurimeve publike.
Sipas Pogajt, gjatë kësaj periudhe OBP ka realizuar 1,649 procedura prokurimi dhe ka gjeneruar rreth 42 milionë euro kursime për buxhetin e shtetit.
Institucioni, sipas saj, u ka shërbyer 242 institucioneve publike, përfshirë spitale, qendra sociale, burgje, institucione të ushtrisë, policisë dhe struktura të tjera shtetërore.
Në deklaratë, Pogaj falënderon ministrin Blendi Gonxhja për besimin e dhënë, ministren Delina Ibrahimaj për bashkëpunimin, si edhe kryeministrin për mbështetjen ndaj rolit të OBP-së në reformimin e prokurimeve publike.
Ajo vlerëson se gjatë drejtimit të saj janë standardizuar proceset, është rritur konkurrenca dhe transparenca, si dhe janë zhvilluar instrumente të reja në fushën e blerjeve publike.
“Arritja më e madhe nuk janë shifrat. Arritja më e madhe janë njerëzit”, shprehet Pogaj, duke falënderuar stafin e OBP-së për profesionalizmin dhe përkushtimin.
Në mbyllje, ajo thekson se detyrat kalojnë, por puna e ndershme dhe kontributi mbeten.
