Atmosfera festive e 1 Qershorit mbërriti këtë vit edhe në ambientet e aeroportit të Rinasit, i cili u “pushtua” për një ditë nga fëmijët dhe krijimet e tyre plot ngjyra e fantazi. Mbi 100 vizatime të realizuara nga fëmijë të moshës 4 deri në 12 vjeç u ekspozuan në terminal, si pjesë e një nisme që feston kreativitetin dhe gëzimin e më të vegjëlve.
Vizatimet, të dërguara përmes një thirrjeje online, u përzgjodhën të gjitha dhe u vendosën në hapësirat publike të aeroportit, duke sjellë një atmosferë të ngrohtë dhe të veçantë për udhëtarët dhe stafin.
Në kuadër të aktivitetit, fëmijët që morën pjesë në nismë u ftuan për një vizitë të veçantë në TIA, ku përjetuan nga afër funksionimin e aeroportit dhe zbuluan botën e aviacionit, duke përjetuar emocionet e një aventure të paharrueshme.
Nën moton “Aeroporti je ti”, kjo nismë u kthye në një festë të vërtetë për fëmijët, duke treguar se aeroporti nuk është vetëm një portë udhëtimesh, por edhe një hapësirë që mirëpret ëndrrat dhe buzëqeshjet e fëmijërisë./skyweb.al
