Erion Veliaj, ka dorëzuar një kërkesë në Gjykatën Kushtetuese duke kundërshtuar vendimin e Këshillit të Ministrave për shkarkimin e tij më 25 shtator.
Ky hap pezullon automatikisht efektet e vendimit dhe bllokon mbajtjen e zgjedhjeve të reja në kryeqytet deri në një vendim përfundimtar të Kushtetueses.
Veliaj e cilëson shkarkimin si të paligjshëm dhe antikushtetues, duke theksuar se neni 62 i ligjit për vetëqeverisjen vendore nuk mund të zëvendësojë nenin 115 të Kushtetutës, por duhet të interpretohet në pajtim me të.
Ai argumenton se shkarkimi i kryebashkiakut është i vlefshëm vetëm në rast të një shkeljeje të rëndë të Kushtetutës ose ligjit, e cila duhet të provohet.
Në kërkesën e tij, Veliaj mbështetet në jurisprudencën e mëparshme të Gjykatës Kushtetuese, e cila ka përcaktuar se:
- dënimi me vendim të formës së prerë,
- ose mungesa e pajustifikuar për tre muaj,
mund të konsiderohen “shkelje të rënda”.
Por, sipas tij, mungesa për shkak të një pamundësie objektive si paraburgimi nuk përbën shkelje të tillë, pasi funksionet e tij u ushtruan nga nënkryetarja e bashkisë në bazë të ligjit.
Veliaj pretendon se Këshilli i Ministrave ka tejkaluar kompetencat kushtetuese duke përdorur vetëm nenin 62 si bazë ligjore, pa e lidhur atë me nenin 115 të Kushtetutës.
Një qasje e tillë, sipas tij, krijon një precedent të rrezikshëm ku një ligj i zakonshëm mund të zëvendësojë Kushtetutën, duke cenuar autonominë vendore dhe parimin e shtetit të së drejtës.
Kërkesa e Veliajt pezullon automatikisht shkarkimin deri në shqyrtimin nga Gjykata Kushtetuese.
Kjo nënkupton se procesi për mbajtjen e zgjedhjeve të reja në Tiranë mbetet i bllokuar derisa të ketë një vendim përfundimtar mbi vlefshmërinë e shkarkimit, një proces që duket se do të zgjasë, ndërkohë që kryeqyteti mbetet pa kryebashkiak. /skyweb.al
